MPCC President-in BJP dopuiah party, kohhran leh NGO a sáwm

Congress party president Lalsawta chuan, BJP chu sakhaw zalenna leh hnam tênaute ziarâng nuaibo tumtu, Mizoram leh Mizo mipui tana hlauhawm an nih avangin BJP dopuiah political party te, kohhrante leh tlawmngai pawlte a sáwm a; "Congress chuan BJP hi kan thawhpui ngai dawn lo a, thawhpui chu sawi loh, kan dodal zel dawn a ni," a ti.

Mizoram Pradesh Congress Committee (MPCC) president Lalsawta hian nimin khan a pisaah thuthar thehdarhtute a kâwm a; "India ram independence hnua ram pum leh a bikin Mizoram tana kan hun tawngah vawiin anga kan hma lam hun thim leh khirh kan tawn hi a la awm ngai lo ang," a ti a, sorkar laipuia BJP kaihhruai sorkar thil tihte a sawi.

Mizoramin hun khirh a tawn chhan sawiin Lalsawta chuan, "Hnam tê zawkte leh sakhaw vawn leh hnam ziarángte nuaibo tura BJP sorkarin sakhaw zalenna leh hnam ziaráng tana hlauhawm thlipui a tlehtir tâk chiam vang a ni. India ram hi Kristiante tana ram hlauhawm zingah ram dangte'n an telh tawh a ni," a ti.

MPCC President chuan, BJP thlipui tleh chuan India ram inpumkhatna a tiderthâwng thei tih sawiin, "He hun thim leh khirh kan tawnah hian BJP thlipui do let turin Mizorama political party zawng zawng thawhhopuiah ka sawm. Political party-te tan chauh do hneh chi a nih loh avangin kohhran leh tlawmngai pawl zawng zawngte pawh ka sawm a, do lêtna dawhkân (forum) din turin ka ngen nghal a ni," a ti. NEDA hmanga BJP thawhpuitute chu BJP aṭanga inthiar fihlim turin a ngen bawk.

Kohhran leh tlawmngai pawlte tan political party do bik neih chi a nih leh nih loh zawhna chhángin Lalsawta chuan, "Tih chi a nih leh nih loh ka ngaihtuah lo a, tih a ṭul a ni. A ṭul a nih chuan kohhranin an do ngam turah ka ngai," a ti.

MPCC president Lalsawta chuan, BJP kaihhruai sorkarin India ram mipui zawng zawngte'n tih dan inang an hmanna tur Uniform Civil Code kalpui an tum tih a sawi a, Mizoram tana dan hlauhawm tak - Forest (Conservation) Amendment Act, 2023 chu Parliament session neih mekah an pawm tawh thu a sawi bawk.

Parliament House pahnihin Forest (Conservation) Amendment Act, 2023 an pawm hnua dodal thu an sawi chhuah chauh chhan zawhna chhangin Lalsawta chuan, "Kan hriatna chu a rei tawh. Keini dodal aia nasa mahin Parliament-ah an dodal a, vawiina dodal kan sawi hian a tlai deuh tawh nâin awmzia a la neih kan ring a, court-ahte pawh kal thei leh dante pawh a awm ang, court-ah kan kal dawn tihna ni loin," a ti.

Lalsawta chuan, BJP kaihhruai sorkar thil tih dan avangin ram pum a mangang tawh nia sawiin, "Eptu party-te intél khawmin thawhhona Indian National Developmental Inclusive Alliance (I.N.D.I.A) an din ta hial a ni," a ti a; I.N.D.I.A a din tawh avangin United Progressive Alliance (UPA) a tàwp leh tàwp loh zawhna chhangin, "UPA hi chu a tàwp turah ka ngai," a ti. UPA hi Congress kaihhruaia political party hrang hrangte intèlkhawmna a ni.

Congress party thupuangtu John Siamkunga chuan, Manipur chungchangah buaina chhuah aṭanga thla thumna thlengin prime minister Narendra Modi a la ngáwi tlat tih sawiin, "Hmarchhak min sawisak dan hi a ná. Mizoram hi BJP-in an la lâk loh awm chhun kan ni a, tun inthlan turah hian lak ngei an tum dawn. BJP do tur hian kan inlungrual a ngai a ni," a ti.