Samagra Shiksha hnuaia thawkte'n thla 3 chhung hlawh an la tawh lo; Hlawh pe thuai turin sorkar an phût

Mizoram RMSA Employees Welfare Association (MIREWA) chuan thuchhuah siamin, Samagra Shiksha hnuaia thawk mi 5,000 chuangin thla thum chhung hlawh an lâk tawh loh avangin an mangang tak zet tawh tih an tarlang a; hlawh pe thuai turin sorkar an phût.

MIREWA chuan, "Thla thum - May, June leh July hlawh kan lak tawh loh avangin kan mang a ang tak zet tawh. Samagra hnuaia thawkte hian a hun takah hlawh kan la ngai lo hle mai a, thla hnih te, thla thumte hlawh la loin kan awm ṭhin. Nupui/pasal fanau hrawk châwm kan ni hlawm a, chhungkaw khawsak phung hrim hrim bakah, kan fate zirna senso thlengin kan hlawh la har lutuk hian nasa takin min nghawng a, manganthlak kan ti hle a ni," an ti.

Samagra hnuaia thawkte zingah hmunpui lama thawkte awm mah se, a tam zawk chu mahni in lum chhuahsana hmun kilkhâwr tak taka thawkte an nih thu an tarlang a, "Kan thawh hlawh ngei pawh rei tak tak kan la thei lo ṭhin hian khawsak a tibuaiin chêt lâk a tiharsa tak zet tawh. Kan sorkar chak tak hian a hnathawk, Samagra hnuaia thawkte hlawh lak loh zawng zawng hi a rang thei ang bera min ngaihtuahsaka min pek thuai kan beiseiin kan phût tlat a ni," an ti bawk.