Lungleia heroin vanga man kum 10 táng tura hrem a ni

Heroin kawl vanga man Lalengzauvi (47) d/o Rualkhuma, Lunglei Venglai chu Lunglei District Court-a special judge (NDPS Act) F Rohlupuia chuan thiamloh a chantir a, kum 10 chhung jail-a táng tur leh Rs 1,00,000 chawi turin a hrem.

Excise & Narcotics department (END) aṭanga thu dawn danin, END chuan March 18, 2021 chawhma dar 10:30 khan Lalengzauvi chu heroin gram 331.500 (hawng 24) a kawl avangin Lunglei Venglaia a dawr nghah­na­ah an man a, NDPS Act, 1985 Section 21(c) tlawhchhanin thubuai ziah luh a ni.

Lalengzauvi chuan heroin a kawl chu Champhai aṭanga Rs 4,80,000-a a lâk a ni a, hlêp neia Lungleia hralh a tum thu leh, heroin chu ṭum hnih a lak tawh thu Court-ah a puang.

Lunglei District Special Court (NDPS Act) chuan August 2, 2023 khan Lalengzauvi chu thiam loh a chantir a, nimin khan hremna tur a puang. Lalengzauvi hi kum 10 chhung táng tur leh Rs 1,00,000 chawi tura hrem a ni a, pawisa a chàwi loh chuan kum khat dang tàn belh tura tih a ni bawk.

Dan loa thil tite an phû tâwka hrem an nih theihna tura thâ leh zung leh ngaihtuahna séngtu te, Court-a thuhretua ṭang Lunglei Venglai YMA hruaitute chungah an lawm thu END chuan an tarlang.