IGNOU, Aizawl Regional Centre thar hawng

Indira Gandhi National Open University (IGNOU), Aizawl Regional Centre in sak thar chu nimin khan sorkar laipuia Education minister Dharmendra Pradhan-a'n online hmangin a hawng a; India ram hmun dang pathuma IGNOU Regional Centre inte a hawng bawk.

IGNOU Aizawl Regional Centre building hi Selesiha awm a ni a, a hawnnaah hian Central KṬP leader Rev.Dr F Pachhunga'n hunserh a hmang. In thar hi square metre 1,036-a zau, Rs 10,63,41,200 sénga sak a ni a, campus sq.m. 14,280-a zau niin, kum 2009-a an neih ṭan a ni.

IGNOU Aizawl Regional Centre regional director Dr SR Zonunthara chuan, Mizoramah kum 2000 khan IGNOU hawn a nih thu sawiin, "District zawng zawngah learner support centre kan hawng vek tawh a, kum 2022 khan academic session-ah zirlai thar 7,195 an awm," a ti a; kum tin January leh July thlaah session ṭan ṭhin a nih thu a sawi.

Hawnna inkhawmah hian IGNOU Headquarters aṭangin pro vice chancellor Prof. Uma Kanjlal, pro vice chancellor Prof. Kiran Hazarika leh Regional Services director Dr Umesh Chandra Panday ten an hmanpui a; sorkar hotu te, learner support centre-a thawk te, zirna-in hrang hrang hotu te, khawtlang hruaitute leh tlawmgai pawl aiawhte an tel bawk.