Muallungthu mibo thiin hmuh a ni

Khawtlangin July 28, 2023 aṭanga an zawn Lallawmsanga (45) c/o Kimi, Muallungthu chu an zawn aṭanga ni sarihna, nimin khan Tuirivâng lui chhakah thiin hmuh a ni.

YMA, Chhimphei Group hruaitute hnen aṭanga thu dawn danin, Lallawmsanga hi hun eng emaw ti chhung chu Tuirivâng lui leh Rangtla báwr velah a khawsa ṭhin a; tun hnaia a khawsakna velah hun eng emaw chen hmuh a nih tawh loh avangin Muallungthu khawtlang chuan July 28, 2023 aṭangin an zawng a, July 31 aṭangin Chhimphei Group YMA-a branch hrang hrangin a inchhâwkin an zawng a ni.

YMA hruaitute sawi danin, Lallawmsanga hi nimin chhun dar 11:50 khan a riahna ṭhin thlám aṭanga metre 500 vela hlá, Tuirivang lui bula feh kawng (link road) chhaka hmuh a ni a, mi kut tuara thi a nih leh nih loh hriat chian la ni lo mah se, mi kut tuara thi a nih an ring.

Ruang hlàwmnaa tel YMA hruaitute chuan, Lallawmsanga taksa leh a lu inzawm loin a awm hrang tih an sawi a; a tisa a chhiat nasat tawh avangin eng vanga a lu leh taksa awm hrang nge tih erawh hriat theih a nih loh thu leh Forensic report-ah a la chian tur thu an sawi bawk.

Lallawmsanga ruang hmuh a nih hian a awm dan avangin an khawih nghal lo a, Forensic lam hotute hrilhin, Forensic lamin an endik hnuah nimin tlai dar 3:30 vel khan kuangah dahin khua panpui a ni. Nizan khan Muallungthuah lumen a ni a, vawiinah State Referral Hospital-a endik a nih hnuah vùi turin Lunglei panpui a ni ang.