Taxation-in thla li chhungin chhiah vbc. 415.84 an hmu

Mizoram sorkara Taxation department chuan sorkar kum 2023-24 kal mek thla li, April-July chhung khan chhiah cheng vbc. 415.84 an hmu a, July thla bikah cheng vbc. 108.75 an hmu.

August 2, 2023 khan Union Finance minister Nirmala Sitharaman kaihhruaiin GST Council Meeting vawi 51-na neih a ni a, Mizoram aṭangin Taxation minister Lalchamliana, secrtetary Vanlal­chhuanga, commissioner R Zosiamliana leh officer dangte an tel. Union Finance minister of state Pankaj Chaudhary leh state leh union territory hrang hranga Finance/Taxation minister-te an tel bawk.

Sorkar thuchhuah tarlan danin, Mizoram Taxation department chuan July 2023 chhunga chhiah cheng vbc. 108.75 an hmuh tawhte chu Goods and Services Tax (GST) aṭangin vbc. 79.34, Value Added Tax (VAT) aṭangin vbc. 27.79 leh Profession Tax cheng vbc. 1.61 a ni.

GST Council ṭhutkhawmah hian pawisa khelhna hmun (casino), sakawr intlansiakna aṭanga pawisa inchawina leh online gaming aṭangtea GST lak dan tur sawiho a ni a; pawisa khelhna hrang hrang aṭangin GST 28% lak remtih a ni.

Pawisa khelhna aṭanga GST 28% la turin tuna GST dan hman mek chu tihdanglam a ngai dawn a, October 1, 2023-a hman theih turin sorkar laipui leh state hrang hrangte chu hma la nghal tura beisei an ni.