Uniting for a Hepatitis-C Free hawng

Health & Family Welfare minister Dr R Lalthangliana chuan nimin khan Directorate of Medical & Hospital Services (DHME) auditorium-ah Uniting for a Hepatitis-C Free Mizoram a hawng.

Uniting for a Hepatitis-C Free Mizoram hi ruihhloa inchiu ṭhinte zinga Hepatitis-C (HCV) dinhmun hriatna leh a veite enkawlna tura Aizawl leh Champhai district-a kalpui tur a ni a; heng district pahnih hi HIV hmuh tamna a ni. Ruihhloa inchiu ṭhinte chu Hepatitis-C an vei leh vei loh endik vek tum a ni a, Hepatitis-C vei hmuhte chu enkawl an ni dawn. Project hi August 2024 thleng kalpui tum a ni.

Health Minister chuan, hepatitis chi hrang hrang zingah Hepatitis-C chu Mizorama hmuh tam bik a nih thu sawiin, "Hepatitis-C hi a danna damdawi a awm lo a, inenkawlna man a sang hle bawk," a ti.

Dr R Lalthangliana chuan, natna hri hmuh chhuah lama thawktu pawl FIND leh damdawi siamtu Roche-in Mizoram district pahnih tan project an siam chu lawmawm a tih thu sawiin, "Anni ṭanpuinain MSACS leh NHM-te thawk dunin hepatitis ûmbo nan theihtawp kan chhuahpui dawn a ni," a ti bawk.