Governor hmalaknain CAU, Imphal-a Mizo zirlaite tan ruahmanna siam

Central Agriculture University (CAU), Imphal vice chancellor Dr Anupam Mishra chuan, CAU-a Mizo zirlai kal mek leh admission ti turte tan ruahmanna an siam thu leh harsatna an tawh loh tur thu Governor Dr Hari Babu Kambhambati a hrilh.

CAU, Imphal vice chancellor Dr Anupam Mishra chuan August 2, Nilaini zan khan Dr Hari Babu Kambhampati chu Raj Bhavan-ah a kâwm a, Mizoram aṭanga CAU-a zir mek zirlaite harsatna tawh chu tihfel a nih thu a hrilh.

Mizo zirlai, CAU, Imphal-a zir mekte chu Imphal-ah exam tura kal loin, College of Veterinary Science, Selesih aṭangin an exam thei dawn a; CAU-a admission ti thar turte tana lehkha pawimawh thehluh ngaite pawh Aizawl aṭangin thehluh theih a nih dawn bakah, class pawh online-in an kal rih thei dawn a ni.