Leiba ngah ber nih chhanah Mizorama sorkar tawhte puh

BJP, Mizoram Pradesh president Vanlalhmuaka chuan, Mizoram chu India rama leiba ngah ber state a nih chhan chu Mizoram sorkar kaihruai tawhtute leh kaihruai mektute vang a nih thu a sawi a; leiba nei tlem ber state a nih theih nan BJP thlang turin Mizoram mipui a sáwm.

Vanlalhmuaka hian nimin khan BJP pisaah thuthar thehdarhtute a kâwm a; "Tun hnaiah Mizoramin India ramah pakhatna nihna kan neih lehna hi a zahthlak leh hle. India ram state leh union territory zinga leiba nei tam ber kan ni mai ni loin kan sang lawr lak. Hetiang dinhmun kan nihna chhan leh a mawhphurtu chu kan state sorkar lo enkawl tawhtute leh tuna sorkar kan hrawn mekte vang a ni a tih loh theih loh," a ti.

BJP President chuan, "Ṭawngkam leh thu chauha hnathawk thiam sorkar ni loin, a taka hna thawk thei sorkar kan neih thuai a ngai," a ti a; kumina MLA General Election awm turah uluk taka ngaihtuahna hmang a, ram leh hnamin nasa taka hma a sawn theihna atana hna thawk thei tur BJP sorkar enchhin ngam tur leh Congress leh MNF party-te chu hnáwl turin Mizoram mipui a sáwm a ni.

State hmasawn bera Mizoram siam turin ṭawngkama sawi fo aiin a taka thawktu tur ram hruaitu ramin a mamawh thu sawiin Vanlalhmuaka chuan, "Thawh chhuah aṭanga chhûta leiba ngah ber nih leh state hlim ber nih hi Mizote leh Kristiante tan, kan ram leh hnam tan a inhmeh loh em avangin MLA election lo awm tur hi kan hman ṭangkai a, thawh chhuah ngah ber leh leiba nei tlem ber state-a kan inhlankai theih nan BJP thlang turin Mizoram mipui kan sawm a ni," a ti.

Mizoram BJP President chuan, Mizo ram leh hnamin tuna a mamawh chu sum thawk chhuak thei leh sum thawh chhuahte ram leh hnam hmasawnna atana hmang ngam, sum leh pai hmannaa langtlang sorkar a nih thu a sawi a; 'Mizoram first, give change a chance' tih chu BJP, Mizoram Pradesh dinna a nih thu a sawi bawk.