ZPM candidate tur thlakte duhsakna hlân

ZPM Political Affairs Committee (PAC) chuan, Serlui bial leh Champhai North biala an candidate tura ruat tawh, chhungkua leh mimal harsatna vanga tun hnaia thlak leh tâkte chu an kal zelna turah duhsakna an hlân.

ZPM PAC member-te August 2, Nilainia ṭhukhawm chuan reso­lution siamin, "July 31, 2023-a Serlui constituency leh Champhai North constituency-a candidate tura kan lo ruat tawhte'n chhungkua leh mimal lamah harsatna an neih thu Nomination Committee-ah an thlen avangin Nomination Committee chuan an aiawh atana an ruatte hi kan thláwp a, an kal zelna turah duhsakna kan hlan a ni," an ti.

ZPM PAC ṭhukhawm hian ZPM hmasawnna an thlir a, "Zoram hmun hrang hranga ZPM hmasawnna kal zel chu a lungawithlak hleah kan ngai," tiin, lawmawm an tih thu an tarlang.

Mizoram mipuite beisei, kalphung thar, mipui sorkar a pian ngei theih nan ZPM-in rim takin hna an thawk mek tih sawiin resolution chuan, "Zoram hmun hrang hranga party mipui taima lehzuala ṭan la sauh sauh turin kan inchah a, politics boruak léng vel karah buai lo leh chî-âi mai lo turin kan inngen a ni," a ti. Mipui ṭawiawmna tel lo chuan an beisei ram an thleng zo dawn lo tih an hriat chian avangin mipui thlâwpna an dil tih a tarlang bawk.