Champhai Jail-ah táng awm thei zat aia 84-a tam an táng mek

Champhai bawrhsap James Lalrinchhana chuan nimin khan Champhai District Jail a tlawh a, thawktute leh jail tángte a kawm. Jail a tâwt thu leh táng awm thei tura ruahman zat aiin mi 84-in táng an tam zawk thu an lo hrilh.

Champhai Jail hi Sirte tlangah November 29, 1990 khan hawn a ni a, mipa 85 leh hmeichhia 20, an vaiin mi 105 tàn theihna tura ruahman a ni. Tun dinhmunah mi 189 táng mekin, mipa 175 leh hmeichhia 14 an ni a; thawktu mi 32 awm mek bawk.

Jail-a táng mek zingah ruihhlo vanga man (NDPS Act) mipa 111 leh hmeichhia 13 an awm a, tualthah thubuaia man mipa pali, pawngsual leh naupang khuaikhem thubuaia man mipa 28 leh, rûkrûk thubuaia man mipa 24 an awm mek a ni.

Champhai DC chuan, jail tángte chu an nun siamṭhatna hmun atan hman tum tur leh, an chhuah hunah khua leh tui ṭha, ram leh khawtlang tana mi ṭangkai ni tura inpuahchah turin a chah.

Champhai Bawrhsap hian District Jail hnenah tarpauline, volleyball leh a lên bakah, Independence Day an lawmna tur Rs 12,000 a hlan a ni.