MRB Chairman leh Chief Minister inkâwm

Mizoram Rural Bank (MRB) chairman Sheryl L Vanchhong chuan nimin khan chief minister Zoramthanga chu a pisaah a hmu a; MRB hmalakna tlangpui leh ruahmanna an neihte hrilhin, mipuite'n ṭangkai zawka MRB an hman theih dan tur a sawipui.

CM Zoramthanga chuan, MRB chu an inzàr pharh ṭhat avang leh an hnathawh a ṭhat avangin mipui hriat an hlawh tih a sawi a, "Khawvel changkang zelah mi tinin bank nena inthlun zawm kan mamawh vek tawh a, hemi kawngah hian MRB hian hna a thawk ṭha a, kan lawm hle," a ti a; MRB-in hma a sawn zel theihna tura sorkara mamawh an neihte thlen zel ṭhin turin a chah.

Sheryl L Vanchhong chuan, tun hnaia recapi­talisation lama an harsatna a sutkiansak avangin CM chu lawmthu a hrilh a; MRB chu hmarchhak state hrang hranga rural bank lian ber a nih thu leh tun hnaiah NABARD-in Best Regional Rural Bank-a a thlan thu a sawi a, MRB annual capital turnover chu cheng vbc. 4,880 chuang a tlin thu a sawi bawk.

MRB hian branch 102 a nei mek a, a ngheta thawk mi 475 an awm. Mini ATM 270 nei an mek a, a dang 75 neih belh tumin hma an la mek a ni.