Judge-in court leh jail a tlawh

Aizawl, Kolasib, Serchhip, Mamit leh Saitual district bialtu District and Sessions judge Vanlalenmawia chuan nimin khan Serchhip a tlawh a; sorkar hotute leh tlawmngai pawl hruaitute nen an inkawm bakah, Serchhip District Court leh Serchhip District Jail a enfiah.

Inkawmhonaah hian The Mizoram Victims of Crime Compensation (Amendment) Scheme, 2016-in a sawi anga chhawmdawlna diltu thubuai 10 chungchang sawiho a ni a; Vanlalenmawia chuan, "The Mizoram Victims of Crime Compensation (Amendment) Scheme-in a tum ber chu mi tu pawh, misual kut tawrh vanga ramtuileiloa an awmin emaw, thihna an tawhin an chhungte hnenah chhawmdawlna pek a ni a, hei hian pawngsual tuarte pawh a huam," a ti.

Sawihonaa tarlan danin, Mizoram Victims of Crime Compensation (Amendment) Scheme hnuaiah chhawmdawlna diltu mi pathum (POCSO hnuaiah pahnih leh IPC Section 304A hnuaiah pakhat)-te dilna pawm a ni a; dilna dang pasarihte erawh chu an thubuaiah court-in thutlukna a la siam loh avangin ngaihtuah ṭhat leh tura dah a ni.

Vanlalenmawia kaihhruaiin Under Trial Review Committee an ṭhu bawk a; tarlan danin, Serchhip District Jail-ah an chungthu ngaihtuah lai (under trial prisoner) mi 40 an awm a, mipa 34 leh hmeichhia paruk an ni a, court-in thiam loh a chantir (convict) tawh mi 25 an táng mek a ni.