Zira'n kum 25 chhung MLA nih a lawm

Minister R Lalzirliana chuan nimin khan Armed Veng North Community Centre-ah kum 25 chhung Mizoram MLA a nihna leh minister a nih theih avanga Pathian hnena lawmthu sawina inkhawm a buatsaih a, chief minister Zoramthanga'n a hmanpui.

R Lalzirliana hi kum 1998, 2003, 2008, 2013 leh 2018-ahte Mizoram Assembly inthlanpuiah Saitual/Ṭawi bial aṭangin MLA atan thlan tlin a ni a; kum 15 chhung, kum 2008 aṭanga 2013 thleng cabinet minister a ni.

Minister R Lalzirliana chuan, a hun tawn zawng zawngte chu Pathian remruatna leh malsawmna zara thleng a nih thu sawiin, a thawhpui ṭhin zawng zawng chungah lawmthu a sawi.

CM Zoramthanga chuan, MLA nihna kalkawng a hautak tih sawiin, "Kum 25 chhung bial ngaia tling thei khawpa malsawmna a dawng hi a hlu a, Pathian hnena lawmthu sawi nachang an hria hian an chhungrila Pathian an neih nghehzia a lang," a ti a, a kal zelna turah duhsakna a hlân.

Kum 25 chhung MLA nih lawmnaah hian minister leh MLA ni mek leh ni tawh mi eng emaw zat an tel a ni.