Mizo dana man leh mual inhlan inneihna tlingah pawm rêl a ni

Mizoram State Law Commission chuan Mizo inneih chungchangah, biak-in thleng kher loa Mizo dana man leh mual inhlan chu inneihna tlingah pawm an rêl tih sorkar thuchhuahin a tarlang.

Mizoram Law Commission hi nimin khan an chairman Lala Khobung hoin a pisaah an ṭhu a, ṭhutkhawm vawi 42-na niin, 'Mizo inneih, inṭhen leh rokhawmna dan, 2024' siamṭhat chungchang an sawiho.

Sorkar thuchhuah tarlan danin, Law Commission hian 'Mizo inneih, inṭhen leh rokhawmna dan, 2024' tihdanglam tumin hun eng emawti aṭangin a buaipui tawh a, a tam zawk chu zawhfel a nih tawh thu nimina ṭhukhawmah hian sawi a ni.

'Mizo inneih, inṭhen leh rokhawmna dan, 2024' hi Law Commission hmasa ber, R Lalrinawma kaihhruaiin an buaipui tawh a, John Siamkunga chairman a nih laiin zût mâm niin, kum 2014 khan Mizoram Legislative Assembly-in a pawm a, February 13, 2015-ah hman ṭan a ni.

Dan chu siamṭhat leh a ngaia hriat a nih avangin Lal Khobung kaihhruai Law Commission chuan an ennawn leh a, Central YMA, MHIP Gen. Hqrs. leh mimal aṭangtein siamṭhat leh tihdanglam rawtnate an dawng.

Rawtna zinga an pawm langsar zingah inneihna chungchang a tel a; tuna tih dan pangngai, biak-ina inkutsuih chu la kalpui thoin, biak-in thleng kher loa Mizo dana man leh mual inhlan chu inneihna tlingah pawm ni se, tih a tel. Dan dinglaiin 'Mizo' tih a hrilhfiahna chu sàwr zìm hret a ni bawk.

Mizoram State Law Commission-ah hian chairman chu Lala Khobung a ni a, member secretary chu Zahmingthanga Ralte, Law & Judicial additional secretary a ni. Member-te chu - Mizoram advocate general Diganta Das, Law & Judicial secretary Helen Dawngliani, Mizoram Judicial Service Association president Thanglianmanga Guite, Mizoram Bar Association president Anil Rinliana Malhotra, additional advocate general C Zoramchhana, additional government advocate Saihmingliana Sailo leh C Lalrinchhunga bakah, district council pathuma CEM ṭheuhte an ni.