PUC-ah NDPS Act zirhona buatsaih a ni; Kuminah heroin kg. 95.683 man tawh
Mizoram State Legal Services Authority (MSLSA) chuan nimin khan Pachhunga Unversity College seminar hall-ah Narcotic Drugs and Psychotropic Substances Act, 1985 (NDPS Act) chungchang zirhona an buatsaih. Kumin January aṭanga August thla tìr thlengin heroin kg. 95.683 man a nih tawh thu tarlan a ni.
Zirhonaah hian Gauhati High Court judge leh MSLSA executive chairman Justice Michael Zothankhuma khuallian a ni a; kumin January aṭanga tun thlenga report an dawn chinah heroin kg. 95.683 man a ni tawh tih sawiin, "Mizoramah ruihhloin bu a khuar mek a, ṭhalaite kan harh chhuah a ngai. Ruihhlo vangin ṭhalai tam takin harsatna an tâwk mek a, ram hmasawnna hna thawk tur ṭhalaite home leh jail-ahte khung boa an awm hi a pawi em em a ni," a ti.
Michael Zothankhuma chuan, kum 2018 aṭanga July 2023 thlengin ruihhlo kg. 4,520.606 leh ruih theih thil chi dang tam tham tak man a nih thu sawiin, chu'ng ruihhlo man kaihhnawihah chuan mi 5,295 man a nih thu leh an zinga mi 3,954 chu thubuai siamsak an nih thu a sawi a; kum 2018-2023 chhunga ruih theih thil chi hrang hrang man hlut zawng chu Rs 81,29,95,21,468.89 a nih thu a sawi bawk.
MSLSA Executive Chairman sawi danin, kumina thla sarih chhung, January-July inkarah ruihhlo chi hrang hrang kg. 289.209 man a ni a; kum 2022 chhungin kg. 756.471, kum 2021-ah kg. 580.632, kum 2020-ah kg. 815.731, kum 2019-ah kg. 1,479.677 leh kum 2018-ah kg. 598.886 man a ni.
Justice Michael Zothankhuma chuan, "Kan ram hmelma ruihhlo hi theihtawpa kan do tlat a ngai a, ruihhlo bâwiha táng mekte chhan chhuak tur hian theihtawp kan chhuah a ngai a ni," a ti a; ruihhlo la ti lote ruihhlo bâwiha an luh loh nan nasa taka ṭan lâk a ngaih thu a sawi.
Zirhonaah hian resource person Dr Chawnglungmuana'n ruihhlo ti ṭhinte chhanchhuahnaa hmalak dan tur leh enkawl dan tur te, ruih theih thil tih ṭhat lohzia leh mihring nun a nghawng dan te, ruihhlo ti lo tura invên dante a sawi. PUC principal Dr H Lalthanzara'n inlawmna thu a sawi bawk.