Myanmar ráltlânte chhinchhiah ṭan

Myanmar buaina vanga sahimna zawnga Mizorama rawn tlânchhiate chu Ministry of Home Affairs thu angin Mizoram sorkar chuan nimin aṭang khan chhinchhiah ṭhatna a ṭan.

Myanmar râltlân Mizorama awm zawng zawng chu an chanchin kimchang chhinchhiahin, temporary identity card pek vek an ni tawh a; Myanmar ráltlân mi 35,000 vel an awma ngaih niin, Zo hnahthlak deuh vek an ni.

Home department aṭanga Vanglaini thu dawn danin, April 18, 2023 khan MHA chuan Mizoram leh Manipur sorkar aiawhte New Delhi-ah an ko a; ram dang aṭanga ráltlân rawn lutte biometric enrolment ti turin an hriattir a, hmanruate an hawhtir nghal a ni.

Biometric enrolment tihna tur khawl neih saah siam rem ngai a awm avangin siamṭhat a ni a; chutih laiin, tun hnaiah MHA Joint Secretary a rawn zin a, Myanmar ráltlânte chhinchhiahna tura belh ngai leh paih ngaite a rawn hrilh.

Home department hotute chuan, Myanmar aṭanga rawn ráltlânte chu an rawn luh tirhin chhinchhiah an nih thu an sawi a, "Thil thar teh chiam a ni lo. MHA-in duh dan an nei a, chu ang chuan kan chhinchhiah ṭha leh dawn tihna a ni," an ti.