India leh Mizoram college dinhmun

Kum 2020-21 dinhmun angin, India ramah university 1,043 leh college 42,343 a awm a, Mizoramah sorkar college 21, professional institution panga leh, private college pakua a awm.

Mizoram University leh Higher & Technical Education department-in July 26, 2023-a press conference an neiha an tarlan danin, India ram puma college 42,343 zinga a zatve tling lo deuh, 40% vel chu stream pakhat chauh zir theihna a ni a; Mizoramah college 30 zinga 62% chu stream pakhat chauh zir theihna a ni.

September 30, 2022 dinhmun angin, Mizoram sorkar hnuaia college zingah zirlai 100 nei tling lo college pakhat a awm a, zirlai 3,000 aia tam nei an awm lo. Zirlai 2,000 nei tling college pahnih - Aizawl College leh Hrangbana College an awm a; Aizawl khawpuia college-te chu zirlai 1,000 nei tling an ni fur a, Aizawl páwn lamah Lunglei College chu zirlai 1,000 nei tling awm chhun a ni.

National Education Policy 2020 ang chuan, kum 2035-ah chuan affiliation system tihbo tum a ni a, kum 2040-ah chuan zirlai nei tlémte tihbo a, college-te chu multidisciplinary institution-a siam a, zirlai pawh 3,000 chuangte neihtir tum a ni bawk.

College-te chu 'multidisciplinary degree awarding autonomous college' ni thei tura siam tur a ni dawn a, college-te chuan stream pakhat chauh kalpui tawh loin, stream hrang hrang an kalpui a ngai dawn a, zirlai pawh 3,000 chuangte nei tura beisei a ni. Hetih lai hian, tun dinhmunah chuan Mizoram sorkara college tinte zirlai neih zat chu chawhrualin 680-700 vel anga chhût a nih thu HTE department hotute chuan an sawi.