Kolasib district-a home-ah ruihhlo vangin mi 554 enkawl mek

Kolasib District Task Force on Ruihhlo Do chu nimin khan an chairman John LT Sanga, bawrhsap hoin an ṭhukhawm a, Social Welfare & Tribal Affairs minister Lalrinawma'n a hmanpui. Kolasib district-a home hrang hrangah ruihhlo vangin mi 554 enkawl mek an ni tih tarlan a ni.

Ṭhutkhawmah hian Kolasib additional SP David JB tarlan danin, Kolasib district-a home hrang hrangah ruihhlo vanga enkawl mek mi 554 an awm a, ruihhlo kaihhnawiha man mi panga leh ruihhlo cheng nuai 16 chuang hû man a ni. Kumin chhungin Kolasib, Kawnpui, Bairabi, Vairengte, Bilkhawthlir leh Saiphaiahte zirlai 2,506 hnenah ruihhlo ṭhat lohzia inzirtirna buatsaih a ni tawh.

Excise & Narcotics assistant commissioner VL Muana tarlan danin, kumin chhungin Kolasib district-ah rakzu litre 1,788, sap zu ûm puitling 7,191, beer bûr 3,876, heroin kg. 2.01 leh methamphetamine gram 734.78 an man tawh a; NDPS Act, 1985 hnuaiah thubuai 18 leh MLP Act, 2019 hnuaiah thubuai 1,754 an ziak lut tawh bawk.

SWTA minister Lalrinawma chuan, ruihhlo chu ram leh hnam hmasawnna dâltu lian tak a nih thu sawiin, "Chhungkua leh khawtlang zalen leh nuam siam turin ruihhlo do a pawimawh a, ruihhlo tihrêmna tura hmalakna beihpui thlak nan State Core Committee din niin, chumi hnuaiah chuan district leh village level-te awmze nei taka kalpui tura duan a ni," a ti. Committee hrang hrang hmalaknate tihlawhtling turin sorkar, kohhran, tlawmngai pawl leh khawtlang hruaitute thawhho ṭhat a pawimawh thu a sawi.

Ṭhutkhawmah hian zirna-in leh kohhran hun hman hrang hrangah ruihhlo ṭhat lohna leh ruihhlo laka fihlim tura inzirtirna kalpui dan tur te, anti-drugs club din a ṭul thu te, veng tinah ruihhlo do kalpui nan village level committee din a ṭul thute an sawi. YMA Sub-Headquarters, Kolasib leh YMA branch hrang hrang hmalak dante pawh tarlan a ni.