KHAWTHLIR

PUC-in thisen pe

Pachhunga University College NSS chuan nimin khan an college-ah thisen pek runpui an huaihawt a, Civil Hospital, Aizawl tan thisen unit 128 an pe. Thisen petute hi Arts stream-a fifth semester zirlai mipa 85 leh hmeichhia 43 an ni. Tun hi PUC NSS-in academic session kal meka blood donation camp an buatsaih vawi hnihna a ni a, July 27, 2023 khan thisen unit 137 an lo pe tawh a ni.

Zirtirtu 123 tanpui

Nimin khan School Education minister Lalchhandama Ralte hoin Teachers Day hman dan tur rêl a ni a; thla 12 kal ta chhungin zirtirtu damlo 123 hnenah chhawmdawlna pek a nih thu tarlan a ni.

DC leh MJA inkâwm

Lawngtlai bawrhsap thar H Lalhmingthanga chuan nimin khan Mizoram Journalists' Association (MJA), Lawngtlai district member-te a pisaah a kâwm. Bawrhsap hian Lawngtlai district hmasawnna atana hmalakna tur pawimawhte sawipuiin, a ṭulna apianga finchhuaha thuràwn pe ṭhin turin MJA member-te a chah a; MJA member-te pawhin district hmasawn nan thawhpui tura an inhuam reng thu an hrilh.

Heroin man

Excise & Narcotics department (END) chuan August 3, Ningani tlai dar 3 khan Ṭhuampuia helipad-ah heroin kg. 2.667 (hawng 220) an man a, nimin khan court-ah an hruai. Heroin neitua puh Vankhuma (29) s/o Chharliana, Khawmawi, Myanmar leh Lalṭhazuala (29) s/o Lalrokima, Thingthelh, Kolasib district, Bawng-kawna khawsa mek nia inchhálte an man nghal bakah, heroin phurhna lirthei pick-up MZ-01 X-8688 an man bawk.

Team vailiam

Deputy chief minister Tawnluia chuan August 3, Ningani khan Mizoram aiawha Sikkim Invitation Football for Celebration of Indian Independence Day 2023-a khel tur Khawzawl Vengthar Football Club chu Khawzawl Vengthar aṭangin a vailiam. Khawzawl Vengthar FC hi chief minister Zoramthanga pawhin Instagram kaltlangin duhsakna a hlan a ni.

Raltlante tan ṭanpuina hlan

Bible's for The World leh Hmar Students' Association (HSA) ṭang dun chuan Manipur aṭanga sahimna zawnga Mizorama rawn lutte tan nimin khan Central YMA hnenah Rs 1,00,000 bakah, Thado-Kuki-English Bible (Thuthlung Thar, Sam leh Thufingte) leh Paite-English Bible (Thuthlung Thar, Sam leh Thufingte) an hlan. Bible an hlan hi bu 2,116 a ni a, Rs 9,05,200 man a ni. Nimin vek khan Tahan Welfare, Aizawlin Manipur-a Zo hnahthlakte ṭanpui nan CYMA-ah Rs 1,00,000 an hlân bawk.