Police hotute leh CYMA hruaitute'n ruihhlo leh kuhva tawlhrûk sawiho

Police hotute leh Central YMA hruaitute chuan nimin khan Police Headquarters conference hall-ah ruihhlo do leh dan loa kuhva tawlhrûk chungchang an ngaihtuah a, ṭha taka thawhho zel an rêl.

Ṭhutkhawm hi DIG (Northern Range) Lallianmawia'n a kaihruai a, Central YMA hruaitute bakah, DIG (Eastern Range), Aizawl, Champhai, Kolasib, Mamit, Khawzawl leh Saitual SP-te an tel. Ram dang kuhva dan loa tawlhrûk tihtawp a nih theih dan tur an sawiho a, ṭan lak tlan zel ṭha an ti.

Ruihhlo vanga harsatna thleng mek leh ruihhlo tam tham tak man a nih ṭhin chungchanga thawhhona ṭha zawk neih theih dan tur sawiho a ni a; ruihhlo vanga buaina leh harsatnain khawpui chauh ni lo, thingtlang kilkhâwr tak tak thlenga a fan chhuah tawh avangin awmze nei zawka do a nih theih nan te, ruihhlo lo luhna district-ahte nasa zawka ṭan lakho zel a nih theih nan thawhho zel ṭha tih a ni.