Mizorama IGNOU study centre hrang hrangah Hindi zirna kalpui tum

Indira Gandhi National Open University (IGNOU) pro vice chancellor Dr Kiran Hazarika chuan nimin khan Raj Bhavan-ah Governor Dr Hari Babu Kambhampati a kâwm a; Mizorama IGNOU study centre hrang hrangah Hindi zirtirna kalpui tum a nih thu a hrilh.

Dr Kiran Hazarika chuan, IGNOU-in hmalakna thar kalpui a tum mek te, Mizorama zirlaite tana themthiamna lam leh thil ṭangkai dang zirna buatsaih tum a nih thute Governor a hrilh bawk.

Dr Hari Babu Kambhampati chuan, IGNOU-in Hindi zirna an kalpui tur chu a thlàwp thu sawiin, "Mizo ṭhalaite’n Hindi an thiam ka duh a, dodalna a awm lo ang. Mizo ṭhalaite hi themthiam tak tak leh thiamthil nei an nih avangin IGNOU kaltlanga skill leh Hindi an thiam kawp chuan páwn lama hna zawnah pawh an hlâwkpui ngei ka ring," a ti.