Minister-in Bar Council hotu a kâwm

Law & Judicial minister TJ Lalnuntluanga chuan nimin khan New Delhi-ah Bar Council of India chairman Manan Kumar Mishra chu a pisaah a kâwm a; Aizawlah All India Bar Examination (AIBE) centre din a nih theih nan hma la turin a ngen.

TJ Lalnuntluanga chuan, Mizoram Law College Student Bar Council ngenna bawhzuiin Bar Council of India Chairman hnenah hian Mizorama law graduate-te'n an zir chhuahte a taka an hman theih nana pawimawh AIBE centre Aizawlah a awm loh thu a hrilh a, "Aizawlah a awm loh avangin Guwahati emaw, Shillong-ahte exam tura an kal a ngai ṭhin a, hei hian harsatna a thlen ṭhin a ni," a ti.

Manan Kumar Mishra chuan, Minister thu thlen chu a ngaih pawimawh thu sawiin, Bar Council of India General Council hmasa berah an ngaihtuah tur thu leh Aizawla AIBE centre din a nih theih nan a ṭul angte bawhzuia hmalak a tum thu a lo hrilh.