Bru-te Tripura-a awm hlenna turin MHA bultumin inremna ziah a ni

Tripura refugee camp-a Mizoram khua leh tui Bru awm mekte Tripura-a an awm hlenna turin nimin khan Ministry of Home Affairs (MHA), Mizoram sorkar, Tripura sorkar leh Mizoram Bru Displaced People Forum (MBDPF) ten New Delhi-ah inremna (agreement) an ziak.

Inremna hi Union Home minister Amit Shah kaihhruaina hnuaiah ziah a ni a; Mizoram sorkar aiawhin chief secretary Lalnunmawia Chuaungo-in hming a ziak. Inremna ziahnaah hian MHA lamin tel tura an sàwm angin chief minister Zoramthanga leh Tripura chief minister Biplab Kumar Deb te pawh an tel.

Agreement ziah a nih tâk avangin Bru-te chu Mizorama hruai kîr an niha chhawmdawlna pek tur angte pawh MHA chuan refugee camp-ah a pe dawn a ni. Tripura-a Bru-te an awm hlen tawh tur chungchang hi Union Home Minister chuan November 29, 2019-a Mizorama political party leh NGO hruaitute New Delhi-a a kawm ṭumin a lo sawi tawh a, "Bru hruai kîr tumna a awm tawh dawn lo a, tuna Tripura-a la chámbángte chu Tripura khua leh tui an ni tawh ang," tiin a sawi.

Hetih lai hian, Vanglaini palai zawhna chhangin Election department hotute chuan, Mizoram electoral roll-a awm mek Bru, Tripura-a awm hlen tawh turte chu Mizoram electoral roll aṭanga paih a harsat loh tur thu an sawi a, "MHA lamin Bru-te hi Tripura-ah an awm tawh dawn tih notification a chhuah a ngai dawn a, electoral roll revision lehah chuan kan paih thei tawh mahna," an ti. Tarlan tawh ṭhin angin, Bru Revolutionary Army nia inchhal­te'n November 13, 2009-ah Bung­ṭhuam tlangval Zarzokima an thah avangin Bru  eng emaw zat chu Tripura-ah an tlânchhia a; kum 1997 tawp lamah mi eng emaw zat chu an lo chhuak tawh bawk. Hun eng emaw chen Tripura camp-a an awm hnuah

May 21, 2010 aṭangin Mizorama lâk lêt hna ṭan a ni a, agreement ziah hma thleng hian lak let hna ṭum kua thawh a ni. Bru hruai kîr hna thawh hnuhnun ber (vawi 9-na) chu October 3, 2019 aṭanga November 30, 2019 chhungin neih a ni a, chhungkaw 200 chuang hret Mizoramah hruaikir an ni. Bru lak lêtna thawh kua neih chhungin Mizorama lêt duh an tam lo a, a tam zawk chu Tripura-a camp-ah an la awm mek.

Mizoram Bru-te hruai kîr turin kum 2016-ah identification tih a ni a, chhungkaw 5,407 chhin­­chhiah an ni tawh a, chu'ng zinga chhungkaw 39 chu Mizoramah an lêt tawh. Kum 2019 khan identification kal­pui leh a ni a, chhungkaw chhin­chhiah tawhte pawh Mizo­­­rama kîr duhte chu chhin­chhiah nawn leh niin, Mizorama lêt duh chhinchhiah zat chu chhungkaw 4,410 an ni.

Bru leh a kaihhnawih Ṭhenkhat

•    October 21, 1997-ah Persang khaw bulah Lalzawmliana, game watcher, Tuikual South kah hlum a nih avangin Bru eng emaw zatin Mizoram an chhuahsan.

•    November 13, 2009-a Bru Revolutionary Army nia inchhálte'n Zarzokima, Bungṭhuam an thah avangin Bru eng emaw zat Tripura-ah an pém.

•    Tripura-a refugee camp-ah awmtir an ni.

•    May 21, 2010-ah Tripura camp-a Bru-te Mizorama hruai kîr hna thawh ṭan a ni.

•    Hruai kîr hna ṭum 9 thawh a ni a, Mizorama lêt an tam lo.

•    Bru lak lêt hna thawh hnuhnung ber neih turah Mizorama kîr duh 4,410 an awm laiin, chhungkaw 200 chuang hret an let.

•    January 16, 2020-ah Bru, Mizorama kîr lote Tripura-a an awm hlenna turin inremna ziah a ni.