BJP pawisa chhawr ṭangkai tumah MPCC Vice President-in ZPM a puh

MPCC vice president Lal Thanzara chuan, ZPM-in inthlan hunah BJP pawisa leh an chakna chhawr ṭangkai an tum nia sawiin, chuvang chuan ZPM Chief Ministerial Candidate-in BJP do turin Mizoram mipui a ngen ngam lo niin a sawi.

Lal Thanzara hian nimina Congress Bha-van-a political session-ah thu sawiin, MPCC President-in Mizo hnam leh sakhua a him nan Mizorama political party, kohhran leh NGO-te chu BJP dopui turin a sawm tih a sawi a, "Inthlan hun atana BJP pawisa leh an chakna chhawr ṭangkai tum ZPM CM Candidate hian BJP do turin Mizoram mipui a ngen ngam lo. Mizorama BJP siam len tumin BJP an len theihna tura kalkawng tur a duanpui a, hetiang khawpa kan hnam min nuai lai hian, BJP kan thawhpui lo ang tih ka sawi thei lo, a la ti duh chauh a ni," a ti.

MNF sorkarin Mizoram mipui an thlenpui theih awm chhun chu leiba ngah ber state nih a nia sawiin Lal Thanzara chuan, "Ram tana ṭangkai lo PAHOSS an sem a, Rs 3,00,000 tiamin Rs 25,000 an sem nél nual. Nationalism sawi chungin damlo pawisa leh sorkar hnathawk hlawh an batsak a, nationalism sawi chungin Zo hnahthak kan unaute nasa taka sawisatu BJP an thawhpuina an chhu chat ngam lo," a ti a, MNF-in nationalism an sawi leh Congress party-in nationalism an sawi a inan loh thu a sawi.

Congress Vice President chuan, kumina inthlan awm tur chu Mizo hnam leh sakhua awm zel dan tur hriltu a ni dawn nia sawiin, "Tunah hian state hrang hranga kohhran leh para-church hnuai missionary-te dinhmun a him loin harsatna hrang hrang an tâwk nasa zual hle. Hindu chawi vung tuma BJP hmalakna hi a tak taka kan vei a hun tawh tak zet," a ti a; sakhua leh hnam himna turin party-a awmna thlan dik a ṭul thu leh ram, hnam leh sakhaw himna tura thawk thei party thlan a ngaih thu a sawi bawk.