Dr Thangtea'n Hnahthiala pisa 2 a hawng
Minister Dr R Lalthangliana chuan nimin khan a bial chhung, Hnahthiala Sericulture department pisa thar leh Food, Civil Supplies & Consumer Affairs pisa thar a hawng.
Dr R Lalthangliana chuan, district thar pathum - Hnahthial, Saitual leh Khawzawlte chu kum li a tlin tawh thu sawiin, chief minister Zoramthanga kaihhruai sorkarin an sorkar aṭanga thla riat chhungin district tharte chu fuke kim takin an tipuitling niin a sawi.
District thar neih a namailo a, kum 1998-a MNF a sorkar hmain Mizoramah district pathum chauh a awm tih sawiin R Lalthangliana chuan, "Kum 1998 chawhnu lam khan Lawngtlai, Serchhip, Champhai, Mamit leh Kolasib district-te hi Congress sorkar khan thu ringawtin a puang. Congress sorkarin a thua a puante kha pangngai takin a rualin kan hlawhtlintir vek a ni," a ti. MNF sorkarin kum 2008-a district thar pathum a puante Congress sorkarin kum 10 chhunga an tihhlawhtlin theih loh chu MNF sorkar bawkin a tipuitling leh tih a sawi bawk.