National Deworming Day hman dan tur rêl

Champhai District Coordination Committe on National Deworming Day chu an chairman James Lalrinchhana, bawrhsap kaihhruaiin DC conference hall-ah an ṭhukhawm a, August 10-17, 2023 chhunga National Deworming Day 2023 thawh hnihna kalpui dan tur sawiho a ni.

National Deworming Day (NDD) hi August 10-17, 2023 chhungin kalpui tur ani a, kum 1-19 inkar hnena rúlhût hlo pek beihpui thlakna leh rúlhûtin a nghawng ṭha lote inhrilhfiahna hun hman a ni ang.

Ṭhutkhawmah hian, NDD thawh hnihna chu August 10, 2023-ah GM Higher Secondary School-a ṭan turin an rel a; rúlhût hlo ei tura tinzawnte'n an ei vek theih nan leh hmaih an awm loh nan thual nawnna (mop-up day) chu August 17, 2023 hian neih ni se, an ti.

Rúlhût hlo (Albendazole) chu health & wellness centre leh health sub-centre aṭangin a hlawmin zirna-in leh anganwadi centre-ahte sem chhuah ni se, naupang leh zirlaite hnenah thawktute'n eitir se, zirna-in leh anganwadi centre-a inziak lut lote chu ASHA-te'n an inah kal chilhin pe se, an ti bawk.

Champhai chief medical officer Dr PC Lalhmingliana tarlan danin, kumin February thlaa NDD 2023 thawh khatna kalpui chhungin Champhai district-ah naupang 51,544 hnenah rúlhût hlo pek a ni a, rúlhût hlo pek tura tinzawn zinga 97.97% pek a ni.