Ukilte'n an harsatna judge an hrilh
Mizoram Bar Association (MBA), Serchhip Welfare chuan August 3, Ningania Serchhip tlawhtu Aizawl Judicial District-a District and Sessions judge Vanlalenmawia hnenah Serchhipah District & Sessions Judge a awm loh vanga harsatnate an lo hrilh.
MBA Serchhip Welfare hruaitute chuan Serchhipa District & Sessions Judge awm loh avangin thubuai lian - tualthah, pawngsual, POCSO Act leh ruihhlo tam tham man kaihhnawih thubuai reng reng Aizawlah ngaihtuah a ngai ṭhin tih an sawi a, "Thubuai neite chu an chungthu ngaihtuah turin Aizawl lamah hruai a ṭul ṭhin a, Police leh Excise-te tan pawh harsatna a awm ṭhin. Civil mi thuhretu koh pawh a buaithlak phah a ni," an ti.
District and Sessions judge Vanlalenmawia chuan, Serchhipa District & Session judge dah chu Gauhati High Court thu a nih thu sawiin, harsatna la awm theite a sawi a; chutihrual chuan, tuna an harsatna tawh chu sutkian thuai a nih theih nan thla tin chawlhkar khat tal Serchhipah District & Session judge an ṭhut theihna tura hmalak ṭha a tih thu a sawi bawk.