Mega Oil Palm Plantation Drive buatsaih

Agriculture department chuan August 3, Ningani khan Aijal Club-ah ‘Mega Oil Palm Plantation Drive’ an buatsaih a, Agriculture minister C Lalrinsanga'n hmanpuiin, oil palm chíngtu hlawhtlingte hnenah Best Farmers Award 2023 a hlàn.

C Lalrinsanga chuan, sorkar laipui leh Mizoram sorkarin oil palm a ngai pawimawh tih sawiin, "Mizoramah kawng hrang hrangin hmalak a ni a, heng zawng zawng hlawhtlinna chu taimaknaah thui tak a innghat," a ti a; thlai tichhe thei natna leh thil dang a awm chuan pui turin sorkar a inpeih reng thu a sawi.

Inkhawma tarlan danin, ram dang aṭanga hriak ei chi (edible oil) lâk luh tihtlêm a nih theih nan oil palm-ah sorkar laipuiin nasa zawkin hma a la a, scheme thar National Mission on Edible Oils - Oil Palm (NMEO-OP) kalpui a ni. NMEO-OP hmalakna atan cheng vbc. 11,040 ruahman a ni a, Mizoramah pawh kum 2022 aṭangin NMEO-OP hnuaiah hmalak a ni.

Mizoramah hian oil palm chìn leh sâwngbàwl a nih theih nan December 2, 2004 khan ‘The Mizoram Oil Palm (Regulation & Processing) Act’ pawm a ni a; oil palm chíngtute'n Godrej Agrovet leh Ruchi Soya Industries /Patanjali Foods-te nen thawhhona an nei mek a ni.