Aizawlah mobile phone rûk a hluar

Aizawl Police chuan tunlaiin Aizawlah mobile phone rûk a hluar thu leh rûk a ni tih hre reng chunga thil leitute chu thubuai siamsak theih an nih thu an tarlang.

Police-te chuan tun hnaia mobile phone rûk lei leh hralh chungchangah hriat­tirna a tichhuak a; "Mobile phone rûkbote hi a rutute'n pawisa an mamawh avangin khaw­laiahte leh social media hrang hrangah a man pangngai aia tlawm uchuaka zuarin an hralh chhâwng ṭhin a, hei hian mobile phone rûk a tihluar hle," an ti.

Mobile phone zawrh chu tláwm uchuak taka zawrh te, charger leh original package tel lo, pattern lock hawn dan hre lote a nih chuan mi rûk a nih theih avangin lei lo turin Police chuan mipui an ngen a; khawlai leh social media-ah tlawm tak taka phone zuar hmute chu police station-ah hriattir turin an chah.

Aizawl Police chuan, rûk a ni tih hre reng chunga bungrua (property) lei chu dan bawhchhiatna a nih thu leh IPC Section 411 hnuaiah thubuai siam theih a nih thu an tarlang a, "Awlsam têa thubuai neih theihna lakah fimkhur a, rûkrûk hluar zel tur vennaa min thawhpui turin mipui kan ngen tak meuh a ni," an ti.