Kolasib College-ah Y20 Meet buatsaih

Sports & Youth Services department leh Mizo Zirlai Pawl (MZP) chuan nimin khan Kolasib College-ah 'Youth 20 Meet on Nationalism, Patriotism & Development' an buatsaih a, minister K Lalrinliana, bialtu MLA-in a hmanpui.

Y20 Meet hi Kolasib College principal T Zahmingliana'n a kaihruai a; minister K Lalrinliana chuan, "Ṭha taka ram humhalh tur chuan hnam ziaráng chawisan te, hnam thuam leh hnam làm vawn nun leh mahni hnam zahpui loh a pawimawh," a ti.

Hnam humhalh nan kawppui zawnah fimkhur a ṭul thu sawiin K Lalrinliana chuan, "Mizo mipate hian pasal tlâk ni turin nun kan uluk a ngai a, innghahna tlak ni turin eizawnnaah taimâk chhuahin, hnam dangte tan pawh entawn tlak ni turin invawng thianghlim ang che u," a ti a; Zo hnahthlak zingah hnam anga inunaunna ṭha leh inlungrualna a pawimawh thu a sawi bawk.

MZP president Lalnunmawia Pautu pawhin thu sawiin, thiamna leh changkanna chu chhiatpuitu ni loin, zirnaa hmasawnpui nana hmang ṭangkaitu ni turin zirlaite a chah. MZP adviser L Ramdinliana Renthlei pawhin thu a sawi a ni.