Mizoram sorkar hnathawkte zingah pension kum tihsan duh lo an tam

Federataion of Mizoram Government Employees and Workers (FMGEW) chuan Mizoram sorkar hnathawkte pension kum hman mek 60 chu kum 62-ah tisang turin sorkar an dil mek a; hetih lai hian Mizoram sorkar hnathawk tam tak chuan pension kum tihsan ṭha an ti lo.

Mizoram sorkar hnathawkte pension hun kum 62-ah tihsan an duh leh duh loh sorkar hnathawk mek group hrang hranga mi eng emaw zat tun hnai khan zawh a ni a; zawhna chhangtu mi 120 zinga 82 chuan tihsan an duh lo. Pension kum tihsan ṭha ti lote hi 68% an ni.

Hetih lai hian, mi 120 zingah pension kum tihsan ṭha ti leh duh mi 19 (15.83%) an awm a, duh zawk nei lo mi 18 (15%) an awm. Kum dik tak hmangahte chauh pension kum tihsan ṭha ti pakhat (0.83%) a awm bawk.

Zawhna chhángtu zingah tuna sorkar hnathawk senior tawh lamte chu kum dik lo hmang, inziak naupang deuh vek an nih thu sawi an tam hle a; pension kum tihsan chu sawi loh, tihhniam zawk duhte pawh an awm nual.

Pension kum tihsan ṭha ti zinga mi officer pakhat chuan, "Khawvel changkang zelah vanglai hun leh chaknate a fei chho zel niin a lang a, chumi thlir chuan kum tihsan ka thláwp khawp mai," a ti. Mi dang pakhat chuan, "Mi náwlpui en chuan a ṭha ka ti, tunlaiahte chuan kum 70 pawh an la upa hleinem le," a ti.

Kum tihsan duh zinga mi pakhat chuan "Tun anga pension hna an kalsan tawh an hnawhkhah zel theih si loh chuan pension kum tihsan a ṭha ka ti," a ti a; mi dang pakhat chuan, sorkar hnathawk rei tawh, tawnhriat ngahte chu an hlut thu leh junior zawk tam takin hna thawh thiamah an tluk loh thu te, thil tih dan turah pension tawhte an ràwn fo thu te, kum 60 chung lamah la chak ṭha tak tak an tam tawh thute a sawi bawk.

Pension kum tihsan duh lo zinga group C-a mi pakhat chuan, pension kum an tihsan a hlau zawk thu a sawi a; officer pakhat chuan, "Doctor-te tun sorkar ṭan tirh lama kum 62-ah an tihsan pawh hi a ṭul lo tawp. Doctor thiam bik eng emawte chu re-employ mai se," a ti.

Hetih lai hian college zirtirtu pakhat chuan, "A mihring azir leh a hna azirin ni thei se. Performance base hian kal thei tawh ila a ṭha ka ti ber," a ti a; pension kum tihsan duh lo zingah sorkar laipuiin a kalpui dan ang zela kal a ṭha maia hria an awm nual bawk.

Tarlan tawh angin, FMGEW-in sorkar hnathawk pension kum tihsan an dil chungchangah hian June 27, 2023 khan DPAR buatsaihin Secretariat conference hall-ah sawiho a ni tawh a, DPAR Secretary-in kaihruaiin, Finance department aiawh, FMGEW, Central YMA, MUP, MHIP, MZP leh MSU aiawhte an tel.
Sawihonaa telte zingah pension kum tihsan diltu FMGEW chuan tihsan ngei an duh a, CYMA leh MHIP-in sorkar thutlukna ang ang an pawm thei a, MZP leh MSU-in an dodal a ni.

Sawihonaa tarlan danin, India rama state 28 zingah state panga-in pension hun atan kum 62 an hmang a, state pakhatin kum 61 an hmang. State 17-in kum 60 an hmang a, state pasarihin kum 58 an hmang a, state pakhatin kum 56 an hmang mek bawk.

TIHSAN DUH LOTE SAWI ṬHENKHAT

* Ka duh lo. Promotion leh phah dawn pawh ni ila ka duh lo, ṭhangthar indàlna mai mai a ni.

* Kum 60 an tlin hma pawha pension tawh mai se tih ngawih ngawih tur an tam em mai.

* A hun ka ti chiah lo, Government of India pawhin a la ti chiah lo a.

* Ti lo nasa. Birth certificate dik loa lut tam tak an la pension lo a, chhawrnahawm tawh lo an tam. Hna tam tak hi digital thila thawh a ngai tawh a, kan uar zel dawn bawk a, computer lama in update peih tawh lo tam tak an ni. Inziak naupang an tam si a, kum eng emaw chhung chu pension kum hi 58 la ni zawk hial se.

* Ti lo nasa mai. An demand ngam ringawt pawh hi a zahthlak ka ti.

* All India service ruala kal zel a ṭha.

* Mi duhâmte propose a ni. Ṭhangtharte'n min dem lutuk palh ang.

* Kum 2013 hnu lamho hi tisang se.