Hmeichhe kaihhnawihah hma la turin MSCW-in DGP leh Aizawl DC a ngen

Mizoram State Commission for Women (MSCW) chuan United Arab Emirates (UAE)-a hna thawk Mizo (domestic worker)-te'n harsatna an tawh chungchangah leh tunlaia Mizo hmeichhe saruak thlalak hluar lutuk chungchangah suo moto cognisance laa chhui chiang turin Mizoram DGP leh Aizawl DC an ngen.

MSCW hian UAE-a Mizo domestic worker-te'n harsatna hrang hrang an tawk nia sawi awm chungchang leh tunlaia Mizo hmeichhe saruak/live sex video hluar chungchang chu chhui chian ngei ngai nia an hriat avangin suo moto hmanga chhui chiang turin DGP leh Aizawl DC hnenah hian ngenna an thawn a ni.

Mizo hmeichhe tam tak chu sum tam zawk thawh chhuah theihna a nih beiseiin ram hrang hrangah hna thawk (housemaid)-in an kal tih tarlangin MSCW chuan "An hnathawhte hi social media-a a lan dan angin, a him lo emaw, an kal dan leh thawn chhuah an nih danah thil fel lo emaw a awm a nih chuan pawikhawihna lian tak, human trafficking a ni thei a, kan ngai thutak hle a ni," an ti.

Mizo hmeichhia, ram hrang hranga housemaid-a kal mekte chungchangah a ṭul anga rang taka chhui zui ngaite chhui tur te, UAE-a thil thleng nia sawi, social media-a darh ta chungchangte chhui chiang tur leh chumi kaihhnawiha dan bawhchhiatna awm theite chhui turin MSCW chuan DGP an beisei tih a tarlang.

Aizawl DC pawh suo moto case kal lai mekah ram danga hna thawk tura Mizo hmeichhiate thawn chhuak ṭhintu, Mizoram hmun hrang hranga placement agency awmte chu sorkar laipui duh dan anga thil an kalpui leh kalpui loh zir chianga chhui turin an beisei bawk.

MSCW chuan, Mizo hmeichhe pakhat Instagram-a live-a mipa pakhat nena mipat hmeichhiatna hmang lai video an hmuh thu an lehkhaah tarlangin, "An duh thu ngeiin an sex hmang lai hi an pholang nia ngaih theih a ni. An sex hmang lai live-a thlirtu pawh an awm nual tih a hriat theih," an ti a; chutiang thil social media-a hmuh theih tura a awm leh ṭhin chu an ngaimawh thu an tarlang.

Mipat hmeichhiatna hmang video mi dang hmuh theih tura ualau taka live-a tichhuaktute chu dan anga na taka hrem theih ngei nia a lan thu sawiin MSCW chuan, "Information Technology Act, 2000 pawhin hetiang thil hi a khap tlat a ni. Hetiang thil hi a thlen nawn tawh loh nan leh a ti ṭhinte pawhin an sim nghal theih nan tun hnaia thil thleng hi uluk taka chhui zui a, pawikhawihtu chu hrem a nih ngei theih nan hmalak ngei a tul tih hriat a ni," an ti.

MSCW chuan, sex video chungchangah hian DGP chu FIR ziah luh a nih a, chak taka bawhzui a nih theih nan a ṭul anga hma la turin an ngen a ni.