Zo fate tana ding tlat CM kan nei - MNF

MNF Media & Publicity depart­ment chuan August 5, Inrinni khan Aizawl Press Club-ah thuthar thehdarhtute an kâwm a; Mizote tana ding tlat ṭhin Chief Minister an nei tih sawiin, "A lawmawmin kan chhuang tak zet," an ti.

MNF Media general secretary VL Kroshnehzova chuan, CM Zoramthanga chu hmun hrang hranga Zo fate tana ding tlat ṭhin, Manipur-a Mizote pawhin pa nih tlinga an ngaih, a thuràwn leh ngennate pawm tlaka an ngaih a nih thu a sawi a, "Chhuanawm kan ti hle. Hnam tana ding ngam, ram, hnam leh sakhaw thilah chuan a dinna sawh sawn mai mai ngai lo, ram leh hnam ṭhatna tura principle nghet tak neitu CM kan nei hi kan chhuang tak zet a ni," a ti.

VL Krosshnehzova chuan, Manipur buaina kal zelah August 3, 2023 khan Indegenous Tribal Leaders' Forum (ITLF) buatsaihin hnam tana martarte vuina hun Haolai Khopi, S. Bualjang/Torbung-ah hman tum a nih thu sawiin, "Hei vang hian Zo fate leh Meitei inkarah a rûka inepna boruak lian tak a awm a, an karah sipai an awm. Nunna tam tak chàn belh thei dinhmunah an ding a ni," a ti a, silai a puah hman thu a sawi.

MNF General Secretary sawi danin, Ministry of Home Affairs (MHA)-in boruak ṭha lo zawk a thleng thei tih hriain lamkal a tír a, martarte vuina hun hman tum chungchangah sorkar laipui aiawh leh ITLF aiawhte'n August 2, 2023 khan ṭum hnih an sawiho. Sorkar laipui aiawhte'n vui hun sawn turin ngen mahse ITLF lam chuan an tihlawhtling nghal lo.

Home minister Amit Shah ngenna angin Manipur leh Mizoram hnaiha awm Assam CM Himanta Biswa Sarma chuan August 2, 2023 zan dar 10 khan CM Zoramthanga chu telephone hmangin a bia a, ITLF hruaitute hnenah mitthite vui hun sawn tura ngen turin a rawn ngen a ni.

CM Zoramthanga chuan ITLF hruaitute dawr dan turah Central YMA president R Lalngheta nen an inrawn hnuah August 2, 2023 zan dar 11 rîk hma khan Manipur-a ITLF hruaitute chu telephone-in a bia a ni.

Chief Minister hian sorkar laipui chu Manipur buaina chungchanga thu thlente ngaihtuahtu tur leh chinfel dan ṭha zawk an beiseite ngaihtuahtu tur an nih avangin an duh ang tihsak phawt a him rih a rin thu ITLF hruaitute a hrilh a; ITLF thuthlukna ngaichângin CM chu a tlaivar a ni.

VL Krosshnehzova chuan, CM Zoramthanga ngenna chu ITLF hruaitute'n August 3, 2023 zing dar 3-a an sawiho hnuah thuthlukna an siam tih sawiin, "Pu Zoramthanga, Zo fate tana ding ngam leh min duhsak em emtu, pa ber dinhmuna kan neihin min ngenna hi a zahawm e, tiin mitthite vui hun sawn an remti ta a ni," a ti. Mitthi vui hun sawn mah se, remruatna fel tak nen Peace Ground, Lamkaah hnam tana martarte pualin hun ropui tak an hman tâk thu a sawi bawk.