Kumin inthlanah Congress party-in sorkarna kan chan ngei ka ring - Hawla

Congress party rorelna sang Congress Steering Committee member Lal Thanhawla leh All India Congress Committee president hlui pahnih Sonia Gandhi leh a fapa Rahul Ganhi te chu August 5, Inrinni tlai khan an inkâwm. Lal Thanhawla chuan, kumin inthlanpuiah Congress party an sorkar ngei a rin thu a sawi.

Lal Thanhawla hi Sonia Gandhi-i'n a sâwm angin New Delhi-a an inah a lêng a, Manipur-a Mizote tawrhna titawp tura chak zawka hmalak dan tur an sawi dun a ni.

Kumina MLA inthlanpuiah Lalsawta kaihhruai Congress party-in sorkarna an chan ngei a rin thu sawiin Lal Thanhawla chuan, "Mizorama mi rin hlawh mi ṭha tak tak kan beisei phak lohte'n Congress an zawm a, tunah pawh mi ṭha, ram hruai tura mipuiin an duhte'n an zawm leh thuai dawn. Heng mite hian Pu Lalsawta hoin Mizoram mipui beisei leh tuihâlna sorkar ṭha an pe ang," a ti a; Rahul Gandhi chu a ṭul anga an chhungkuaa che chhuak turin a ngen.

Rahul Gandhi chuan Lal Thanhawla ngenna chu chhangin, Mizoram mipui chu a pa aṭang tawhin an chhungkaw ngainat an nih thu a sawi a, "Mizoram mipui mamawhna anga chêt chu an tan thil tih châkawm tak a ni reng ang," a ti a; a ṭul ang zela Mizoram tana chêt an tum thu a sawi.

Lal Thanhawla chuan, Manipur-ah BJP sorkar leh Central-a Narendra Modi kaih­hruai BJP sorkar vanga Zo fate tawrhna rei lutuk titawp turin a rang lama hmalakna thuai a ṭul thu a hrilh.

Rahul Gandhi chuan, Manipur-a tualchhung buaina chungchanga hma a lak tawh dante a sawi a, "Manipur-a Mizote tawrhna titawp tur leh Mizoram tan theihtawp ka chhuah zel ang," a ti.