A tak taka ram vei turin chah

ZPM party chuan Salem Veng Local Council by-election awm tura campaign khuh­hawnna hun August 4, 2023 zan khan Salem Veng YMA Hall-ah an hmang a, campaign hawngtu Lalnghinglova Hmar chuan, ZPM mipuite chu danglam tur leh a tak taka ram vei turin a chah.

Aizawl West-II biala MLA candidate tura ZPM-in an ruat Lalnghinglova Hmar chuan, a tak taka ram vei a ṭul thu sawiin, "ZPM, Salem Veng hi kan taima bik tur a ni a, mi dang aiin kan bei nasa tur a ni. Sorkarna siam tawhte tih dan anga kan kal a, kan danglam loh chuan ZPM nih hi a ṭulna a awm lo ang. Zirlaite ngaihtuahnaah ZPM hi sorkar ve tawh se, fair takin hna lak ni se, an ti a, chutiang chu ZPM sorkarah hmuh an châk a ni," a ti.

Bialtu MLA Lalchhuan­thanga chuan, ZPM a sorkar chuan cor­rup­tion an do dawn nia sawiin, "Kan hna hmasa ber chu corruption do a ni. MLA leh minister an corrupt ve thiang lo. Corruption kan do tlat chuan kan hna chanve zo tluk kan ni ang," a ti a; ZPM candidate turte chu an campaign-naah pawh eiru lo tura intiam chunga campaign ngam an nih thu a sawi.

Bialtu councillor Malsawmzuala Ralte pawhin thu sawiin, local council inthlanah taimak leh thawhrim a pawimawh tih sawiin, "Hlawhchham thiang kan ni lo tih hi hawpui ṭheuh ang u," a ti.