Synod bultumin environment humhalh chungchang sawihona buatsaih a ni
Synod Social Front chuan ramngaw, nungcha leh tuihna humhalh chungchang sawihona August 4, 2023 khan Synod Committee Room-ah an buatsaih a; environment humhalh pawimawhzia kohhran, sunday school leh ni tin sikulah uar taka inzirtir a ṭulzia an sawi hlawm.
Synod hruaitute bakah, sorkar aṭangin PHE department, Environment, Forest & Climate Change department leh Mizoram Pollution Control Board hotu te an tel a; Central YMA leh environment humhalhna lama hma la ṭhin pawl hrang hrang aiawhte an tel. Synod executive secretary i/c Social Front Rev. VL Luai Hranleh-in a kaihruai a ni.
Sawihonaah hian ramngaw, nungcha leh tuihna humhalhnaa ṭan lakho dan tur hrang hrang sawi a ni a; lui kam leh lui hnárah tuihna siam thei chi thing phun belh te, tlang sang lam leh luikam ruam tihngaw a ṭul thute leh mipui zirtir dan turte sawiho a ni. Kohhran, sunday school leh ni tin sikulahte environment humhalh pawimawhzia uar taka inzirtir a ṭulzia an sawi a, a ṭul anga la inràwn khawm zel an tum.
Sawitute chuan, nungchate sa ei ṭhin an la awm pawi an tih thu te, sa pèl chíng an la awm pawi an tih thu te, sairawkherh nena sava vehte pawh hmuh tur an la awm thu te, ramngaw a chereu nasat tawh avangin tuihna kang chat a awm tak nual thu te, bawlhhlawh ṭawih thei lo paih duh dahin nghawng pawi tak a neih thute an sawi.
Parliament-in tun hnaia a pawm Forest Conservation Amendment Bill pawh sawiho a ni a, FCA Bill chu ṭha an tih loh thu leh an duh loh an sawi hlawm a ni.
SAWIHONAA SAWI ṬHENKHAT
▶ Riverine Forest Reserve area-te sorkarin a ngaihsak tâwk lo a, RFR area-ah mimal ram nei an awm nual tawh a, hralh chhâwng pawh an awm ta nual tawh.
▶ Sorkar hmalak tur awm tam takah sorkar nawr a ṭulin a lang.
▶ Reserve Forest area-a mimal ram neih chungchang sorkarah thlen ni se.
▶ Khua leh veng tina khawtlang hruaitute'n RFR area humhalh a ṭulzia an hriat chian a ngai. Sorkar leh VC-te hman tur dan ṭha tak siam a ṭul.
▶ Kohhran inkhawm, naupang, tleirawl leh ṭhalai inkhawmah inzirtirna uar zawka kalpui a ṭul.
▶ Ramngaw humhalh chungchangah dan/inkaihhruaina mumal siam a hun tawh a, mipuiin an zawm ṭhat a ṭul. Dan zâwm lote hremna siam tel a pawimawh.
▶ Lui tui luan dan mumal lo lutuk ngaih pawimawh a hun.
▶ Plastic bawlhhlawh chungchangah uluk zawka hmalak a ṭul.
▶ Synod Social Front hmalaknain mass awareness campaign neih theih ni se.
▶ Zirlaibu-ah enviroment humhalh pawimawhna chungchang telh ni thei se.
▶ Political party tinin ramngaw humhalh chungchangah policy mumal tak nei se.
▶ Political party tin hnenah ramngaw, nungcha leh tuihna humhalh chungchangah hma la tura ngenna thlen ni se.
▶ Forest Conservation Amendment Bill duh lohna kawngzawh NGO Coodination Committee ruahmannain huaihawt ni thei se.