Court tihchangtlun nan sum pe chhuak thuai turin ngen

Law & Judicial minister TJ Lalnuntluanga chuan August 4, 2023 khan New Delhi-ah sorkar laipuia Law and Justice minister of state (independent) Arjun Ram Meghwal a kâwm a; Mizoramin court tihchangtlun nan sum a mamawh tam thu hrilhin, sum pe chhuak thuai turin a ngen.

TJ Lalnuntluanga chuan Arjun Ram Meghwal chu Mizorama court hmun­hma tihchangtlung dan tur sawipuiin, "Mizoramin litigation lamah hmasawnna nasa tak a nei a, court changtlung kan mamawh. Court tihchangtlunah state-in bul a ṭan lai a nih avangin fund awm ang angte pek tam deuh kan mamawh," a ti a; Lunglei leh district thar pathum tana court building sak thuai a nih theih nan sum pe chhuak thuai turin a ngen a ni.

Champhai District Court building sak tur building drawing chu Guwahati High Court-in a pawmpui tawh chu sak ṭan thuai a nih theih nan CSS for Development of Infrastructure Facilities for the Judiciary hnuaiah sum pe thuai turin Law and Justice Minister a ngen bawk.

Law and Justice minister Arjun Ram Meghwal chuan, Law & Judicial Minister thil thlente chu a rang lama tihfel a tum tur thu a lo hrilh niin sorkar thu­chhuahin a tarlang.