ASF vangin vawk 70,927 a thi tawh

Vawk pùl hri, African Swine Fever (ASF) vangin Mizoramah vawk 70,927 a thi tawh a, chu'ng zinga 46,482 chu hri vanga thi niin, 24,445 chu hri darh zel tur venna atana suat a ni.

ASF vang hian March 21, 2021 aṭangin Mizoramah vawk a thi ṭan a; March 21, 2021 aṭanga December 31, 2021 chhung khan ASF vanga vawk thi 33,417 leh suat 12,568 a awm. Nikum 2022 khan February thla aṭangin Mizoramah ASF hri a darh leh a, nikum khan vawk 12,791 a thih bakah, vawk 11,594 suat leh a ni bawk.

Kumin 2023-ah May 5 aṭang khan Champhai district-ah vawk hri vang hian vawk a thi leh ṭan a; AH&Vety department chhinchhiah danin kumin bikah May 5 - August 4, 2023 thleng khan district pangaa khua/veng 17-ah ASF a léng tih finfiah a ni tawh a; vawk thi 274 leh suat 283, a vaiin ASF vanga vawk thi leh suat hi 557 a ni. Mizorama ASF hri a lèn ṭan tirh kum 2021 March 21 aṭanga August 4, 2023 thleng khan ASF vang hian vawk 46,482 a thi tawh a, vawk suat 24,445 awm tawh bawk a, ASF vanga Mizorama vawk thi zawng zawng chu 70,927 a tling tawh a ni.