Manipur ráltlânte ṭanpuina hlân

MZP Gen. Hqrs leh Chin Baptist Church (CBC), Indianapolis, USA chuan August 5, Inrinni khan Manipur aṭanga Zo hnahthlak ráltlân, Saipum leh Saiphai khuaa awmte hnenah ṭanpuina an hlan.

Manipur raltlan Saipumah chhungkaw 60 (mi 172) vel leh Saiphaiah chhungkaw 15 (mi 48) an awm mek a; MZP leh CBC hian Saipuma awmte tan Rs 5,000, buhfai ip 16 leh damdawi chi hrang hrang an pe a, Saiphaia awmte tan Rs 5,000 leh buhfai ip riat an pe. North Chawnpuia raltlante tan Rs 1,000 leh buhfai ip khat an pe bawk.

MZP president Lalnunmawia Pautu chuan, Mizote chu 'Sem sem dam dam' ti ṭhin an nih thu sawiin, "In unaute'n kan ei chhung chu in nghei lo ang," a ti a, anmahni enkawltu khawtlang hruaitute nen ṭha taka thawkho zel tur leh khawtlang tana harsatna siam lo turin a chah.