Zobawk All NGO-in Tlawng lui hnára sorkar hmalakna tihkhawtlai pawi an ti

Zobawka pawl hrang hrang - Zobawk All NGO chuan thuchhuah siamin, an khuaa Tlawng lui hnara hmasawnna hnathawh mekte tikhawtlai theia hmalakna awm chu ṭha lo an tih thu leh ná an tih thu an tarlang a; ram leh hnamin hma a sawn zel theih nan sorkarin hmasawnna hna a thawhte ṭanpuitu ni turin mipui an ngen.

Zobawk All NGO-ah hian local council pahnih, YMA group, joint leh branch hrang hrang, MUP, MHIP, MZP, MSU leh Zobawk Consumer Association-te an tel a ni.

NGO-te chuan, Zobawk chu kum 1856 aṭanga awm a nih thu leh Tlawng hnár chu an pi leh pute hun aṭanga an tui lâkna ber a nih thu tarlangin, "VC leh YMA ten kum tam tak theihtawp chhuaha kan enkawl leh humhalh ṭhin a ni," an ti.

All NGO tarlan danin, boruak leh tuihna ṭha an neih theih nan VC-te leh YMA branch-te'n thing, mau leh changélte an phun ṭhin a, leilung leh tui kal ral tur vên nan contour-te an siam a, kângmei laka him nan kum tin meikawng an sial ṭhin. An hmalaknate avangin Tlawng hnárah ramngaw ṭha tak an nei a, kum 2014/2015 vel aṭangin an khua chu ngaw ṭha takin a hual a ni.

Tlawng hnárah Amrit Sarovar Mission kalpui niin, PHE department-in recharging dam an siam mek tih sawiin NGO-te chuan, "Kan tui tlan tipung lehzual tura hmalak mek tihkhawtlaia a awm hi pawi kan ti a, chhunzawm a nih theih nana hma min laksak turin Mizoram sorkar an ngen a ni," an ti a; Lunglei khawpui tui lakin Zobawk a thlen loh avangin Zobawkin a hranpaa Tlawng hnár tui an lâk chu tihmâkmawh a nih thu an tarlang.

NGO-te chuan, Tlawng hnár kama Mizoram State Sport Academy siam mekna hmun chu tun hma aṭangin ramngaw a ni ngai lo a, dí leh hling bawn hmun a ni tih sawiin, "Sport Academy siam a nih avang hian ramngaw tihchhiat emaw, tuihna tihtlem leh tihbawlhhlawhna a awm lo. Sport Academy leh recharging dam hnathawh mek hi mi tute emawin forest clearance a awm lo tiin court-ah an zualko hi pawi kan ti hle a ni," an ti.

Zobawk All NGO chuan, an khuaa hmasawnna hna thawh mekte mi ṭhenkhat hmalakna avanga tihkhawtlai a ni chu ná an tih thu an tarlang a; hnathawhte chu mipui tana ṭangkai tak tur a nih avangin a puitlin thuai theih nan theihtawp chhuahpui zawk turin Mizoram mipui an ngen a ni.