KHAWTHLIR

Biak-in rawk

Zobawk Vengthlang Presbyterian Kohhran biak-in chu rawk a nih bakah tihchhiat a ni. Thu dawn danin, biak-in maichàma zing ṭawngṭai inkhawm bu pawhthler a ni a, vestry tihchhiat a nih bakah, sakramen semna no leh thleng a bo bawk. Biak-in rawk leh suasam a nih thu hi August 5, Inrinni zing khan hriat a ni a, kohhran hruaitute chuan FIR thehluh an tum lo thung.

Auhla intihsiak

Aizawl Smart City Limited chuan Amrit Ustav puala Aizawl chungchang auhla inphuahsiak (slogan writing competition) a buatsaih resut an puang. Intihsiak thupui chu 'About Aizawl City' tih a ni a, mi 18-in thu 53 an thehlut. 'Aizawl, the heartbeat of Mizoram' tih Jacob Lalrawngbawla, Khatla thehluh chu pakhatna a ni a, lawmmanah Rs 3,000 leh certifcate hlan a ni.

Faina hnatlang

Lunglei bawrhsap Ramdinliani hoin August 5, Inrinni khan DC pisa leh UDPA pisaa thawkte'n khawpui fai inelna (Swachh Survekshan) pualin Pûkpui leh Zotlang inkarah faina hnatlang an buatsaih. Kawngpui sira thing phunte tihfaiin, chinai an hnawih a, Pukpui Centenary leh kawngpui sira bawlhhlawhte an chhar fai bawk.

Hnam puanzar zar

India ram zalenna champha vawi 75-na lawmna, Azadi Ka Amrit Mahotsav (AKAM) pualin August 13-15, 2023 chhung hian Independence Day lawmna pualin Har Ghar Tiranga kalpui a ni leh dawn. A duh apiang tan mahni inah India hnam puanzar zàr theih a ni a, sorkar pawhin mahni inah hnam puanzar zár turin chhung tinte a ngen a ni.

Engineering counselling

Higher & Technical Education department chuan Degree in Engineering and Architecture atana spot round counseling chungchangah hriattirna a tichhuak. Counseling hi August 10-14, 2023 chhungin HTE (Technical Wing) office examination hall-ah buatsaih a ni dawn a, JEE (Main) 2023 exam-a 45% mark hmu (ST/SC tan 40%) leh class XII-a 50% mark hmu chinte tel theih a ni.