Khawthlangtuipui leh Tuichawng lui lian vangin chhungkaw 85 insaseng

Tun hnaia ruahsûr avangin Khawthlangtuipui a lian a, chenna in eng emaw zat a chîm avangin nimin tlai thleng khan chhungkaw 40 chu hmun him lamah an insaseng tawh a; Tuichawng lui leh Chawngte lui lian vangin nimin tlai dar 4 thleng khan Chawngte khuaa chhungkaw 45 an insaseng tawh bawk.

Tlabung aṭanga thu dawn danin, Khawthlangtuipui lian hian nimin tlai lam thleng khan a chîm sàn belh zel a, hei vang hian Tlabunga chhungkaw 30-te chu tuilian chîm phak loh hmun him lamah sawn an ni.

Nunsury khuaah chhungkaw pali leh Tippereghat khuaah chhungkaw paruk chu hmun himah an inthiar chhuak tawh a; tui chîm a san zel pawha a ṭul anga insaseng thuai thei turin chhungkaw eng emaw zat an inring bawk.

Tlabung SDO (Civil) H Zonunmawia kaihhruaiin mawhphurhna hrang hrang chelh tura ruat Tlabung VC, Khawthlangtuipui Group YMA leh Young Pahari Association aiawhte'n tuilian tuarte chhawm­dawl hna an kalpui a ni.

Bialtu MLA Nihar Kanti Chakma chuan tuilian tuarte chhawmdawl hna kalpui dan enpuiin nimin khan hmun hrang hrang a fang a; hmun hima insuan lutte hnena sem turin buhfai ip 10 a ruahman nghal. Tlabunga truck neitu intél khawmte chuan tuilian vanga inthiar chhuah ngaite bungrua phurh nan a thlâwnin lirthei an thawh.

Tun ṭuma Khawthlangtuipui lian hi kumin bika a chîm sàn lai ber a ni a, kum 2017 leh 2018-a a len ṭuma a chîm chin erawh tui chîm chin hian a la thleng lo hle thung. Khawthlangtuipui hnár lamah ruah a hàn meuh loh avang leh la sûr chhunzawm zel tura ngaih a nih avangin tui chîm chin a sàn belh zel rih an rin thu Tlabunga YMA hruaitute chuan an sawi.

Chhawngte khuaah pawh Tuichawng leh Chawngte lui lianin zual lam a pan zel a, chhungkaw 45 chu an chenna in aṭanga insasengtir an ni tawh. Chawngte khua hi Tuichawng leh Chawngte lui infinnaah a awm a ni.

Chawngtea journalist Omeg Lalramkinlova hnen aṭanga thu dawn danin, Tuichawng lui lian hian nimin zing lam aṭang khan Chawngte-C ah chenna in a chîm ṭan a, hei vang hian chhungkaw 45 chu Chawngte SDO (Civil) Lalneihthanga Colney leh khawtlang hruaitute ruahmanpuinain hmun himah an insaseng a, sikul leh hall-ahte awmtir an ni.

Nimin khan niléngin Chawngte leh a chhehvelah ruah a sûr a, India Meteorological Department tarlan danin, nasa zawka ruah la sûr zui zel theia ngaih a nih avangin hmun hima insaseng tur an la awm belh rin a ni.

Chawngte SDO(C) chuan tuilian leh a kaihhnawiha harsatna awm theite a vil reng a, insaseng belh tur an awm pawha an invawm luh nghal mai theihna turin sikul leh hall-te ruahman lâwk a ni. SDO chuan, mipuite chu chî-âi lo tura chahin, sorkarin ruahmanna a siamte zâwm thiam turin a ngen.

Hetih lai hian, Chawngte RD Block huam chhunga awm khaw dang - Borapansury leh Parva lamah pawh tuilianin nunphung a tikhaihlak nasa hle nia thu dawn a ni bawk.