ZPM chuan a thlawna sum sem kan do tlat - ZPM Working President

ZPM working president K Sapdanga chuan nimin khan an party pisaa inkhawmah thu sawiin, a thlàwna sum sem ZPM-in an do tlat thu leh politics khelh dan thianghlim lantir an tum thu a sawi a; an party chhuahsan tawhte chu ZPM-a lêt leh turin a sáwm.

K Sapdanga chuan, "ZPM chuan a thlawna sum sem kan do tlat a, Mizoramah politics khelh dan thianghlim lantir kan tum," a ti. ZPM-in kalphung thar an zawrh chu an khingpui party-te'n hrilhfiah thiam lo-ah an puh ṭhin tih sawiin Sapdanga chuan, 'Kalphung thar, mipui sorkar awmzia' a sawifiah.

K Sapdanga chuan, ZPM sorkara budget session hmasa berah thlai thar leina tur sum budget-ah an dah dawn tih sawiin, "Hei hi kum 50 kal ta chhunga sorkar ding tawhah a la awm ngai lo a, Mizoram tan kalphung thar a ni. Bul ṭanna atan thlai chi li-ah enchhin a ni ang. A thar huna a man tur bithliah sa a ni dawn... Thlai dang chíngtute pawh an hah thlawn loh dan tur ruahman hmaih a ni lo ang. Kan thutiamah kan ding ngam em tih min enchhin turin kut hnathawktute kan cho a ni," a ti.

Tun hma lawkahte chuan hna thawh tur a awmin sorkarin tender a chhuah a, registered contractor-te'n an chháng ṭhin tih sawiin Sapdanga chuan, "Contractor dik takin hna a thawk a, sorkar engineer-te'n an endik ṭhin. Tunah erawh chuan contract-a thawh chi hna rêng rêng open tender chhuah a awm tawh mang lo a, a hmutu tur thlan sa vekin, ruling party worker-te kutah a lut fai ta vek a. ZPM hian thuneihna a chan chuan contract hna chu contractor kutah a kîr leh ang," a ti a, hlemhlêtna awm lo turin thuneitute'n fîr taka an ven dawn thu a sawi.

ZPM Working President chuan, ṭhalaite mahni kea dinga nupui fanau châwmna tur an thawh chhuah theih dan tur ruahmanpui chu an sorkar hna hmasa tur a nih tur thu sawiin, "Ṭhalai, mahni kea din châkte bána kaih policy hi Mizoramah kan la hre ngai lo a, kalphung thar zingah ram hmasawnna atan ṭangkai pawl tak tur a ni. ZPM hi mawhphurhna bel kan nih ve chuan mamawhte bána kai chhuak turin a inpeih nghal ang," a ti.

Mizo pa kutchhuakte a mawi a, a tlo em em laiin, sorkar office tam berah state páwn lam siam, tlo lo zawk, manto zawka lei a ni ṭhin chu a ṭulna an hre lo tih sawiin Sapdanga chuan, "ZPM hi sorkara mawhphurtua hlàn kai a nih phawt chuan sorkar building leh sorkar luah in reng rengah Mizo pa siam furniture te, Mizo nu tah parda-te hman kan tum. He thil ti tur hian harsatna chhetê mah a awm lo," a ti a; Mizoram sum tam tak state páwna chhuak ṭhinte chu Mizo mistiri leh puan tahtute kutah a luh dawn thu a sawi.

K Sapdanga chuan, hun rei tak ZPM lo hahpui tawh ṭhenkhatin ZPM an kalsan chu vanduaithlak an tih thu sawiin, "Ngaihdam kan ṭulna apiangah min ngaidam a, lo kîr leh turin tih tak zetin kan sáwm a ni," a ti a; ZPM-a an kîr thei tawh lo a nih pawhin, an thlen chin chinah hlawhtlinna nei ngei turin an duhsak thu a sawi bawk.
ZPM Inkhawmah hian Working President-in an party zawm tharte a lawm lut niin ZPM thuchhuah chuan
a tarlang.