Mizo mipuite tana thawk chhunzawm turin MNF a inpeih - MNYF President

MNF party chuan nimin khan Mizo Hnam Rûnah chhung inkhawm an hmang a, thusawitu MNYF president Dr L Thangmawia, MLA chuan, Mizoram pumah ZPM bânsanna thli a tleh mek niin a sawi.

Dr L Thangmawia chuan, Lunglei Municipal Council inthlan leh local council by-election-ah ZPM an chak a, sorkar tur thâwkin an thaw nia sawiin, "An hlim nui ri pawh a reh hmain mi dang aia ṭha bika an infak mawi chawpna chu anmahni ngei aṭangin an nih bik lohzia a takin a lang mek. Mizoram political history-ah hetiang em ema party thuneitu sang ni pha leh hruaitu lawk chinte'n MLA inthlan kuma an party an bànsan tam hi a la awm ngai lo," a ti.

ZPM-in kalphung thar an zawrh chu anmahni chhung ngeiah innghahna tlak a nih lohzia a lang mek nia sawiin L Thangmawia chuan, "MLA candidate siam pawh inkhualtelem nana hmangin, nimin lawka an tihfel hlim pawh an duh hun hunah an thlâk leh mai thei zel," a ti a; ZPM kalphung thar chu MNF-in an tlin ve ngai dawn loh thu a sawi.

MNYF President chuan, Mizoram politics dinhmun mek enin, sorkarna siam turin Congress leh ZPM la inpeih lohzia mipuiin an hmu mek niin a sawi a, "Pathian leh mipui zarah MNF hian sorkarna kan siam leh ngei dawn a ni tih a ni tèlin a lang chiang zel a ni," a ti.

L Thangmawia chuan, tun MLA term-ah hun harsa tak karah châwl loin sorkarin hmasawnna hna tam tak a thawk nia sawiin, "MNF sorkarin hun harsa kara a hmalaknate hi bu tam taka siam tham a ni tawh. Sorkarna siam leh tur leh Mizo mipui tana thawk chhunzawm turin kan inpeih leh tawh a ni," a ti a; chief minister Zoramthanga chu a hun taka Pathian remruat a ni tih hai rual a ni lo niin a sawi bawk.