Mizo ram, hnam leh rinna humhim tura thawh a hun tak zet - Lalsawta

MPCC president Lalsawta chuan nimin khan Positive Women Network of Mizoram (PWNM) hotute an pisaah lèn chilhin a kâwm a; Mizo ram, hnam leh rinna humhim tura thawh a hun tak zet thu a sawi.

Lalsawta chuan, mihringte chu famkim lo, hun kal tawha tihfel loh tam tak nei ṭhin an nih thu sawiin, "Hun liam tawh chu koh kîr theih a ni lo. Tuna kan tih tur hmasa ber chu kan ram, kan hnam leh kan rinna humhim turin keini leh nangni tana kan thawh a hun tak zet a, kan tihmâkmawh a ni," a ti.

Mihring nunhonaah harsatna leh inpuih ngaihnaah ṭan lâkho a ṭul thu sawiin Lalsawta chuan, "Harsatna hi tu chungah pawh a tla thei vek. Harsatnain a tuai hriam loh mihring an chhawr tlak loh a, harsatna tam tak paltlang a, beidawnna leh manganna hmachhawntute hlawhtlinna a hlu bik a ni," a ti a; vanduaina tawh chánga indâwm kàn leh inpuih tawn chu Isua zirtir dan a nih thu a sawi.

Inkawmnaah hian PWNM hruaitute'n an pawl din dan leh hmalak dante an sawi a; sorkar nena an thawhona dan te, kohhran hmeichhiate thawhpuina an hlâwkpui thu te, Mizorama HIV veite dinhmun leh an harsatnate an sawi a ni.

PWNM hruaitute chuan, HIV darh zel tur vênna turin ruahmanna ṭha zawk nena hma thar lak a ngaia an hriat thu te, ruahmanna ṭha zawk nena hma thar lak a nih chuan Mizorama HIV dinhmun nasa taka thunun theih dan turte an sawi bawk.