SEDP 2nd phase sem hun la tifel lo

Mizoram sorkar flagship programme, Socio Economic Development Programme (SEDP) hnuaia sum fai sem thawh hnihna, second phase sem hun tur tihfel a la ni lo.

Vanglaini palai zawhna chhangin SEDP Executive Board vice chairman H Rammawi chuan, SEDP 2nd phase sem hun tur tihfel a la nih loh thu hi a sawi a, "Tun thla (August) tàwp lamah sem hman ngei chu kan duh. Sem hun tur erawh tihfel a la ni lo," a ti.

SEDP Executive Board Vice Chairman sawi danin, vawiin hian SEDP Executive Board an ṭhukhawm dawn a, an rêl tur zingah SEDP 2nd phase sem hun tur chungchang a tel.

Ruahman dan chuan, SEDP 2nd phase-ah hian chhungkaw 60,000 hnenah ṭanpuina sum pek a ni dawn a, ṭanpuina pek turte thlan a ni tawh. Ṭanpuina chu Rs 50,000 sem tur a ni a, thawh hniha pek tur niin, thawh pakhatah Rs 25,000 ve vea pek tur a ni.

SEDP first phase-ah pawh chhungkaw 60,000 hnenah ṭanpuina pek a ni a, instalment hnih thoin ṭanpuina sum sem a ni.