India kum 75 tlin lawmna pualin Jail táng 18 chhuah an ni dawn

Mizoram sorkar chuan sorkar laipuiin ruahmanna a siam angin, India-in zalenna a hmuh champha vawi 75 tlin lawmna pualin Mizorama jail hrang hranga táng mi 18 a chhuah dawn.

Ministry of Home Affairs (MHA) aṭanga lehkha an hmuh angin Mizoram sorkar chuan State Screening Committee a din a, Committee chuan jail-a táng mek zingah India zalenna champha kum 75 tlin lawmna puala chhuahtir tlak turte an zir chian hnuah mi 18 chu Independence Day, August 15-a chhuahtir turin thutlukna an siam.

Screening Committee-ah hian chairman chu additional chief secretary emaw Home secretary emaw an ni tur a ni a, member secretary chu Prison department DG/IG niin, Law secretary chu member a ni.

MHA chuan Guidelines for Granting Special Remission to Prisoners a siam a, chutah chuan India ram zalenna kum 75 tlin champha lawmna puala jail táng chhuahtir theihte leh chhuahtir rem lote a tarlang. Chhuahtir turte chu a tlangpuiin pawi lian tham khawih ni lo, jail-a tàn hun chhung tur pawh rei vak lote an ni hlawm.
Mizoram sorkar chuan India zalenna kum 75 tlin lawmna pual hian jail táng ṭum hnih a lo chhuah tawh a, tun hi a ṭum thumna tur a ni.

A ṭum khatna August 15, 2022 (Independence Day) khan táng mi 25 chhuah an ni a, a ṭum hnihna January 26, 2023 (Republic Day) khan mi 19 chhuahtir an ni
tawh bawk.

TÁNG CHHUAHTIR THEIH LOHTE

▶ Thi tura an chungthu rel tawhte

▶ Dam chhunga táng tura hremte

▶ Pawngsual, mihringa sumdawnna leh naupang khuaikhem thubuai vanga tángte

▶ Ruihhlo kaihhnawih (NDPS Act, etc.) vanga tàngte

▶ Eirûk thubuai Prevention of Corruption Act, 1988 vanga tángte