Governor leh Padma Shree dawngtuin Hindi tihhmasawn dan tur an sawi dûn

Governor Dr Hari Babu Kambhampati chuan nimin khan Raj Bhavan-ah Mizorama Hindi tihhmasawnna lama thawh hlâwk vanga Padma Shree 2021 dawngtu C Kamlova a kâwm. C Kamlova chuan, Hindi zirtirna tura Mizoram sorkarin North Eastern Council-a rawtna a thlen chu a hlawhtlin theih nan hma lâkpui turin Governor a ngen.

Dr Hari Babu Kambhampati chuan, C Kamlova thawhrimna leh Hindi zirnaa hma a lak tawhnate fakawm a tih thu a sawi a, "Mizoramah ṭhalaite'n sap ṭawngah harsatna an neih loh laiin Hindi-ah hmasawnna tur an nei. Mizo ṭhalaite hian theihna sang tak an nei a, an thiamnate behchhan hian India ram khawi hmunah pawh eizawnna ṭha tak tak an hmu thei a, chutihrualin, Hindi an thiam tel a ṭha," a ti.

C Kamlova chuan, Larsapin Hindi zirtirna uar tura hmalakna kalpui a duh chu phûrawm a tih thu a sawi a, "Tunah hian sikulahte Hindi zirna ṭha taka kalpui a nih rualin, mipui náwlpuiin Hindi an zirna tur chuan hmalakna thar a ngai. Rawtna siam a ni tawh a, Mizoram sorkar pawhin a pawm tawh. Tunah hian NEC hnenah Art & Culture department-in a thawn tawh a ni," a ti.

NEC-a rawtna thlen ang chuan, Hindi zirna turin lehkhabu buatsaih a ni dawn a, lehkhabu chu a thlawnin sikul, pawl leh a duhtute hnenah sem tur a nih thu C Kamlova chuan a sawi. Kum tin NEC hnuaiah India hmarchhaka Hindi zirna atan sum dah a nih thu te, chumi behchhan chuan rawtna siam a nih thute a sawi bawk.