National Handloom Day hman a ni

Nimin kha National Handloom Day vawi 9-na a ni a, sorkar laipuia Ministry of Textiles ruahman angin India ram pumah hman a ni. Mizoramah pawh Aizawl leh Kolasib-a National Informatics Centre video conference room-ah hman a ni a, Aizawlah hian Sericul-ture minister Lalrinawma'n a hmanpui.

Sericulture Minister hian Sailam cluster-a puan tahtute hnenah yarn passbook leh lighting unit a hlan a; Sericulture department hmalaknaa la rawng thlak zirna - Samarth training kalte hnenah certificate hlan a ni. Chawhnu lamah puantah kaihhnawiha sorkar hmalakna inhrilhfiahna, quiz leh design intihsiakte buatsaih a ni bawk.

Lalrinawma chuan, puantah chu eizawnna ṭha tak a nih thu sawiin, "Mizoramah leh hmarchhak state dangahte kan handloom kutchhuak hi demand a ṭha a, demand a sàn belh zel nan hmalak a ṭul. Mahni kutchhuak ngei hmanga ram páwn lama innghat loa intodelh tumna rilru hi hnam humhimna pawimawh tak a ni," a ti a; puantah tihhmasawn zel a pawimawh thu a sawi.

Ministry of Textiles hnuaia Weavers Service Centre deputy director Dr P Vasu, Mizoram Commerce and Industries deputy director Hunthianghlimi leh NHDC manager Lalvensanga te pawhin thu an sawi a ni.

National Handloom Day lawmna pui ber chu New Delhi-a Pragati Maidan-ah prime minister Narendra Modi hoa hman a ni a; Prime Minister thusawi hi India ram hmun hrang hranga NIC Centre-ah puan tahtute'n online-in an ngaithla a ni.